کورونا کی تشویشناک صورتحال، وزیر اعلی پنجاب نے  سخت اقدامات کا عندیہ دے دیا

?️ 25 اپریل 2021

لاہور(سچ خبریں)کورونا کی تشویشناک صورتحال  کو مدنظر رکھتے ہوئے وزیراعلیٰ پنجاب عثمان بزدار نے سخت اقدامات کا عندیہ دے دیا۔ کورونا مریضوں کی وجہ سے اسپتالوں پر دباؤ ہے، احتیاط کریں، اموات کی شرح میں اضافہ تشویش ناک صورت حال اختیار کر چکا ہے۔

تفصیلات کے مطابق صوبہ پنجاب کے وزیراعلیٰ نے خبردار کیا ہے کہ مارکیٹوں اور بازاروں میں رش سے کورونا تیزی سے پھیل رہا ہے، احتیاط نہ کی گئی تو صورت حال سخت اقدامات کی طرف جا سکتی ہے۔ تاہم انہوں نے واضح نہیں کیا کہ مکمل لاک ڈاؤن لگے گا یا دیگر پابندیاں عائد کی جائیں گی۔

عثمان بزدار نے کوہ سلیمان میں دوران خطاب ایس اوپیز پر عمل درآمد کی اپیل کی۔ ان کا کہنا تھا کہ کورونا مریضوں کی وجہ سے اسپتالوں پر دباؤ ہے، احتیاط کریں، اموات کی شرح میں اضافہ تشویش ناک صورت حال اختیار کر چکا ہے، صرف ماسک پہننے سے کورونا سے بچاؤ ممکن ہے، کورونا کی وجہ سے اجتماعات سے گریز کریں۔

انہوں نے کہا کہ ایس او پیز پر عمل کرکے انسانی جانوں کو محفوظ بنایا جاسکتا ہے۔خیال رہے کہ ملک کے دیگر صوبوں کے مقابلے میں پنجاب میں کورونا کے زیادہ کیسز رپورٹ ہورہے ہیں۔ ادھر نیشنل کمانڈ اینڈ آپریشن سینٹر(این سی او سی) نے گزشتہ روز کے اعداد و شمار جاری کرتے ہوئے کہا ہے کہ ملک میں 24 گھنٹوں میں کرونا کے مزید ایک سو اٹھارہ مریض انتقال کر گئے۔

این سی او سی کا کہنا ہے کہ ملک میں کرونا انفیکشن سے انتقال کرنے والوں کی مجموعی تعداد 17 ہزار 117 ہو گئی ہے، جب کہ ملک میں 7 لاکھ 95 ہزار 627 پازیٹو کرونا کیس سامنے آ چکے ہیں۔