اسلام آباد (سچ خبریں) وفاقی وزیر سائنس اینڈ ٹیکنالوجی فواد چودھری نے کہا ہے کہ لاہور اور کراچی میں کچرے کا حل وزیراعظم کا کام نہیں، کچرا اٹھانا وزیراعظم کا نہیں مقامی انتظامیہ کا کام ہے، وزیراعظم کا بیوروکریسی کو پیغام ہے کام کرے، اگر چیف سیکرٹری کام نہیں کررہے تو گھر چلے جائیں۔
انہوں نے میڈیا سے گفتگو کرتے ہوئے کہا کہ مریم نواز کی سیاست نے ن لیگ کو سنٹرل پنجاب تک محدود کردیا ہے۔پہلے یہ عمران خان کیخلاف تھے اب یہ آپس میں لڑ رہے ہیں۔ پیپلزپارٹی اب اندرون سندھ کی جماعت بن کررہ گئی۔ جو کام ضیاالحق نہیں کرسکا وہ آصف زرداری نے کردکھایا۔ انہوں نے کہا کہ 2018 الیکشن میں دھاندلی کا الزام لگایا گیا لیکن کمیٹی میں ثبوت نہیں دیے۔
ڈسکہ اورسینیٹ الیکشن پر حکومت اوراپوزیشن دونوں کہتی ہےکہ طریقہ کاردرست نہیں۔ جب ہم اصلاحات کررہے ہیں تو آپ اس میں شامل نہیں ہوتے۔
عمران خان کے سوا کسی جماعت کے پاس اگلے الیکشن کیلئے پورے امیدوار بھی نہیں۔ حکومت اور اپوزیشن دونوں انتخابی اصلاحات چاہتے ہیں تو ناراضگی کیسی؟ اگلے الیکشن الیکڑانک ووٹنگ سسٹم کے ذریعے کرانا چاہتے ہیں۔ تاکہ الیکشن کے نتائج بروقت وصول ہوں۔ اپوزیشن کو اب عمران خان فوبیا سے نکل آنا چاہیے۔ اپوزیشن نے ڈھائی سال کوشش کی عمران خان کو نہیں ہٹا سکی۔
اپوزیشن نے تیس مارخان بن کردیکھ لیا، پالیسی پرنظرثانی کریں، اب مذاکرات پرآنا چاہیے۔ ہمیں صرف نوازشریف اور زرداری کے مقدمات پر تو بات نہیں کرنی۔ ہم ہروقت نوازشریف، مریم اور زرداری کے مقدمات پر بات نہیں کرسکتے۔ انہوں نے کہا کہ لاہوراور کراچی میں کچرے کے ڈھیر لگے ہیں۔ سمجھ نہیں آتی مقامی حکومتیں کیوں ویسٹ ٹو انرجی پروگرام نہیں لاتیں۔لاہور یا کراچی میں کچرے کا حل وزیراعظم نے نہیں کرنا، ہر کام وزیراعظم نہیں کرسکتے، یہ مقامی انتظامیہ کا کام ہے۔ وزیراعظم کا بیورو کریسی کیلئے پیغام ہے کام کرے۔ بیوروکریسی کو کام کرنا ہوگا اور منتخب نمائندوں کو احترام دینا ہوگا۔ اگر چیف سیکرٹری کام نہیں کررہے تو گھر چلے جائیں۔
