پی ٹی آئی کا رویہ یہی رہا تو عمران خان کی اڈیالہ جیل سے منتقلی ہوسکتی ہے۔ رانا ثناءاللہ

?️ 10 دسمبر 2025

اسلام آباد (سچ خبریں) مشیر وزیرِاعظم سینیٹر رانا ثناء اللہ نے کہا ہے کہ پی ٹی آئی کا رویہ یہی رہا تو عمران خان کی جیل منتقلی ہوسکتی ہے۔

رانا ثنا اللہ کا کہنا تھا کہ جیل سے منتقلی کا کوئی فیصلہ نہیں ہوا، اڈیالہ جیل کے باہر دھرنوں کی وجہ سے شہریوں کو مشکلات کا سامنا کرنا پڑتا ہے۔ اُنہوں نے کہا کہ اگرپی ٹی آئی کا یہی رویہ رہا تو پھر حکومت اڈیالہ جیل سے منتقلی کے حوالے سے غور کر سکتی ہے، تحریک انصاف والے انارکی پھیلا رہے ہیں، اس طریقے سے تو بانی پی ٹی آئی سے ملاقات نہیں ہوگی۔

مشیر وزیرِ اعظم کا کہنا تھا کہ رات دو بجے تو کسی کی ملاقات نہیں ہوسکتی، سڑک بلاک کرنے سے پرامن احتجاج کیسے ہوگیا، حکومت یا جیل انتظامیہ کا ملاقاتوں کے حوالے سے واضح موقف ہے۔ رانا ثنا اللہ نے کہا کہ انہی ملاقاتوں کےبعد وہی ہوتا ہے جو ہمارا دشمن ملک چاہتا ہے، ملاقاتوں کے بعد ٹویٹ ہوتا ہے، بانی ایم کیو ایم نے جب پاکستان مردہ باد کا نعرہ لگایا تو ایم کیو ایم لندن علیٰحدہ ہوگئی تھی۔

اُن کا کہنا تھا کہ بانی پی ٹی آئی ٹویٹ میں افواجِ پاکستان کے خلاف ہرزہ سرائی کر رہے ہیں، بانی پی ٹی آئی اگر پیچھے نہیں ہٹیں گے تو بانی ایم کیو ایم کے انجام کی طرف بڑھ رہے ہیں۔ مشیر وزیرِ اعظم نے کہا کہ سپرنٹنڈنٹ جیل نےعظمیٰ خان سے کہا تھا باہر جاکر میڈیا میں سیاسی بات نہ کریں، عظمیٰ خان نےوعدے کے باوجود وہی کچھ کیا، سپرنٹنڈنٹ جیل نے تو قانون پر عمل کرنا ہے۔

رانا ثنا اللہ کا کہنا تھا کہ دشمن ملک کے ساتھ مل کر دفاعی ادارے کے سربراہ کے خلاف ہرزہ سرائی ناقابل برداشت ہے، بانی پی ٹی آئی سے روزانہ کی ملاقاتوں سے ہی 26 نومبر کی منصوبہ ہوئی، 2018 کا الیکشن ہم بھی جیتے تھے، اپنی دورِ حکومت میں بانی پی ٹی آئی ہماری سیٹیں چھین کرہی پلس ہوئےتھے۔

اُنہوں نے کہا کہ سینیٹرمشعال نےکہا کہ بانی کو سہولتیں میسر نہیں، سینیٹر مشعال نے کہا تھا کہ آپ کی سربراہی کمیٹی بنےجو جیل میں جائے، جیل رولز مجھے کمیٹی بنانے کی اجازت نہیں دیتا، میری معلومات کے مطابق بانی پی ٹی آئی کوتمام سہولتیں میسرہیں۔

مشیر وزیرِ اعظم کا مزید کہنا تھا کہ ڈسٹرکٹ اینڈ سیشن جج کو قانون اجازت دیتا ہےکہ وہ جیل کا معائنہ کریں، گزشتہ ایک سال سےہم اِن سےکہہ رہے تھے ڈائیلاگ کریں۔