پنجاب میں ڈیجیٹل رمضان نگہبان پیکیج کا آغاز، 40 لاکھ گھرانوں کو 40 ارب روپے امداد

?️ 14 فروری 2026

لاہور (سچ خبریں) پنجاب حکومت نے مستحق خاندانوں کی معاونت کیلئے ڈیجیٹل رمضان نگہبان پیکیج کا باقاعدہ آغاز کردیا ہے۔

پنجاب انفارمیشن ٹیکنالوجی بورڈ کے تحت پیکیج کے ہرمرحلے پر شفافیت یقینی بنانے کے اقدامات مکمل کرلئے گئے ہیں جبکہ معلومات اور رہنمائی کیلئے 08000-2345 ہیلپ لائن بھی قائم کردی گئی ہے۔ صوبے کی ہر تحصیل میں 160 خصوصی مراکز فعال کئے گئے ہیں جہاں شہریوں کو رجسٹریشن اور رہنمائی کی سہولت فراہم کی جا رہی ہے۔

وزیراعلیٰ مریم نواز نے نگہبان اے ٹی ایم کارڈ کے اجرا پر اطمینان کا اظہار کرتے ہوئے بتایا کہ 40 لاکھ گھرانوں کو مجموعی طور پر 40 ارب روپے مالی امداد دی جائے گی۔ ان کا کہنا تھا کہ امداد کی ادائیگی مکمل طور پر ڈیجیٹل اور شفاف نظام کے تحت ہوگی تاکہ نہ لمبی قطاریں ہوں اورنہ ہی شہریوں کو کسی مشقت کا سامنا کرنا پڑے۔

وزیراعلیٰ کے مطابق اے ٹی ایم کارڈ کی ڈلیوری کا عمل شروع ہوچکا ہے جبکہ کارڈ ایکٹیویشن اور رقم کے حصول کیلئے برانچ لیس بینکنگ ایجنٹس اور آؤٹ لیٹس بھی مقرر کردیئے گئے ہیں۔ مریم نواز نے کہا کہ رمضان المبارک میں راشن کارڈ کی مالی امداد 3 ہزار سے بڑھا کر 10 ہزار روپے کردی گئی ہے۔

مزید برآں ہر تحصیل میں نگہبان دسترخوان کے تحت روزانہ لاکھوں روزہ داروں کیلئے افطاری کا اہتمام اور سہولت بازاروں میں رعایتی نرخوں پر اشیائے ضروریہ کی فراہمی یقینی بنائی جائے گی۔