پاکستانی زائرین انفرادی طور پر عراق نہیں جاسکیں گے۔ محسن نقوی

?️ 15 جولائی 2025

اسلام آباد (سچ خبریں) پاکستان، عراق اور ایران نے زائرین کی سہولیات کیلئے مشترکہ ورکنگ گروپ تشکیل دینے کا فیصلہ کر لیا۔

تفصیلات کے مطابق وفاقی وزیر داخلہ محسن نقوی نے کہا ہے کہ عراق اور ایران جانے والے زائرین ہمارے لئے بہت اہم ہیں،سہ ملکی کانفرنس سے زائرین کو مزید سہولت ملے گی، پاکستان کی درخواست پر سہ ملکی کانفرنس کے انعقاد پر ایرانی وزیر داخلہ سکندر مومنی کے شکر گزار ہیں ، وزیراعظم پاکستان اور دیگر اعلیٰ حکام نے جنگ میں ایران کے لئے انتہائی متحرک و مثبت کردار ادا کیا۔

ذرائع کے مطابق ان خیالات کا اظہار انہوں نے پاکستان کی درخواست پر زائرین کے مسائل کے حل کیلئے بلائی گئی سہ ملکی کانفرنس سے خطاب کرتے ہوئے کیا۔ وزیر داخلہ نے کہا کہ جنگ میں شاندار فتح پر ایران اور ایرانی وزیر داخلہ کو مبارکباد دیتا ہوں۔

وزیر داخلہ نے کہا کہ پاکستان نے ایران پر حملے کی کھل کر مذمت کی اور ایران کے حق دفاع کو مکمل طور پر سپورٹ کیا۔ محسن نقوی نے کہا کہ جنگ کے دوران پاکستانی عوام ایرانی عوام کے ساتھ کھڑے رہے، پاکستان اور ایران بھائی ہیں اور ہمیشہ بھائی رہیں گے۔