پاکستان ہمارے بزرگوں اور تحریک آزادی کی جدوجہد کا نتیجہ ہے

🗓️ 15 اگست 2021

فیصل آباد (سچ خبریں) فیصل آباد میں ہفتے کی صبح کمشنرز کمپلیکس کے لان میں یوم آزادی پاکستان کے موقع پرشاندار و پروقارمرکزی تقریب کا انعقادکیا گیاجس کے مہمان خصوصی وزیر مملکت اطلاعات و نشریات فرخ حبیب تھے جبکہ اس موقع پر کمشنر ثاقب منان،ڈپٹی کمشنر محمد علی، سٹی پولیس افسران، چیئرمین قومی اسمبلی قائمہ کمیٹی برائے خزانہ و اقتصادی امور فیض اللہ کموکا، رکن قومی اسمبلی شیخ خرم شہزاد، مقامی اداروں اور انتظامیہ کے عہدیداروں، ارکان صوبائی اسمبلی، تعلیمی اداروں کے سربراہان،سول سوسائٹی اور ہر مکتبہ کے لوگ، طلبہ، صحافی، وکلا اور علما بڑی تعداد میں موجود تھے۔تقریب کے آغاز پرصج 8 بجکر 58 منٹ پر سائرن بجائے گئے اور ایک منٹ کی خاموشی اختیار کی گئی۔ بعد ازاں وزیر مملکت فرخ حبیب نے صبح 9 بجے پرچم کشائی کی۔

اس موقع پر پولیس،سول ڈیفنس اور ریسکیو 1122 کے دستے نے مارچ پاسٹ اور سلامی پیش کی اور فضا میں کبوترو غبارے چھوڑے گئے جبکہ شرکا ئے تقریب نے یک زبان ہوکر قومی ترانہ پڑھا اور بچوں نے ملی نغمے پیش کےی۔تقریب سے خطاب کرتے ہوئے وزیر مملکت اطلاعات و نشریات فرخ حبیب نے کہا کہ پاکستان ہمارے بزرگوں اور تحریک آزادی کی جدوجہد میں بے شمار قربانیاں دینے سمیت شہدا و غازیوں کی لازوال کاوشوں کا ثمر ہے جبکہ اللہ نے ہمارے ملک کو دنیا کی ہر نعمت سے نوازا ہے اور اس ایٹمی ملک کے پاس کے ٹو سمیت دنیا کی بلند ترین چوٹیاں،کوسٹل،کھیت کھلیان،ہریالی و میدان اور بہترین لوگ موجود ہیں نیزپاکستان کا دفاع ناقابل تسخیر اور مضبوط ہاتھوں میں ہے۔ انہوں نے کہا کہ ریاست مدینہ کی طرز پر فلاحی ریاست کا قیام دراصل قائد اعظم کی تعلیمات و فرمودات کا ہی تسلسل ہے۔ اس لیے ہم پاکستان کی سا لمیت، ترقی و خوشحالی،کمزور طبقے کی معاونت،فلاحی ریاست کے قیام اور سبز ہلالی پرچم کی سربلندی کے لیے کوئی کسر اٹھا نہ رکھیں گے۔