پاکستان گریٹر اسرائیل منصوبے کو سختی سے مسترد کرتا ہے۔ اسحاق ڈار

?️ 25 اگست 2025

اسلام آباد (سچ خبریں) وزیر خارجہ اسحاق ڈار نے کہا ہے کہ پاکستان گریٹر اسرائیل کا منصوبہ مسترد کرتا ہے، غزہ میں فلسطینی اسرائیل کے بدترین مظالم کا شکار ہیں، غزہ میں پناہ گزین کیمپوں، اسپتالوں پر اسرائیلی حملے عالمی قوانین کی صریحاً خلاف ورزی ہیں۔

اسحاق ڈار نے جدہ میں او آئی سی وزرائے خارجہ کے فلسطین کی صورتحال پر ہوئے غیر معمولی اجلاس میں کہا کہ فلسطین میں اسرائیل کے مسلط کردہ قحط کے باعث ہنگامی امداد کی فراہمی اشد ضروری ہے۔ اجلاس میں سعودی وزیر خارجہ فیصل بن فرحان کا کہنا ہے کہ اسرائیل غرہ میں یکطرفہ کارراوئیاں کر رہا ہے، غزہ میں اسرائیلی حملے عالمی قوانین کی سنگین خلاف ورزی ہیں، گریٹر اسرائیل وژن کسی صورت قبول نہیں۔

اسحاق ڈار نے کہا کہ اسرائیلی حملوں میں بے گناہ فلسطینوں کو شہید کیا گیا، غزہ میں 60 ہزار کے قریب بچے شہید کیے گئے۔ انھوں نے کہا کہ او آئی سی کا ہنگامی اجلاس بلانے پر ترکیہ اور ایران کے شکر گزار ہیں۔ اسرائیل کی جانب سے بین الاقوامی قوانین کی خلاف ورزیاں کی جا رہی ہیں، فلسطینیوں کو اجتماعی سزا دی جا رہی ہے ۔

اسحاق ڈار نے کہا اسپتالوں، اسکولوں اور پناہ گزین کیمپوں پر حملے عالمی قوانین کے خلاف ہیں، فلسطین میں قحط کی صورتحال ہے، فوری اقدامات ناگزیر ہیں۔ انھوں نے کہا کہ عالمی برادری غزہ میں مستقل اور غیر مشروط جنگ بندی کیلیے اقدامات کرے، اسرائیل کا گریٹر اسرائیل منصوبے خطے میں امن کیلئے خطرہ ہے۔ پاکستان اس منصوبے کو سختی سے مسترد کرتا ہے، غزہ میں انسانی امداد کی فوری اور محفوظ رسائی ممکن بنائی جائے۔

وزیر داخلہ نے کہا کہ غزہ سے جبری بیدخلی اور قبضے کا فوری خاتمہ کیا جائے، پاکستان عرب ممالک کی خود مختاری اور سالمیت کی حمایت کرتا ہے۔ عالمی برادری اسرائیل کے خلاف سخت اقدامات کرے، مسئلہ فلسطین کے 1967سے پہلے کی سرحدوں پر مبنی دو ریاستی حل کے حامی ہیں۔