پاکستان کا افغانستان میں زلزلے سے متاثرہ لواحقین سے تعزیت کا اظہار

18 جنوری 2022

اسلام آباد (سچ خبریں)افغانستان کے صوبت بادغیس میں شدید زلزلے کے باعث بچوں اور خواتین سمیت چھبیس افراد جاں بحق ہوگئے زلزلے کی شدت پانچ اعشاریہ تین ریکارڈ کی گئی، تاہم  پاکستان نے افغانستان میں زلزلے سے قیمتی جانوں کے ضیاع پر اظہار افسوس کرتے ہوئے متاثرہ لواحقین سے تعزیت کا اظہار کیا ہے۔

تفصیلات کے مطابق ترجمان دفتر خارجہ کی جانب سے بیان میں افغانستان میں زلزلے سے قیمتی جانوں کے ضیاع پر اظہار افسوس کرتے ہوئے کہا گیا کہ افغان صوبہ بادغیس میں زلزلے سے جانوں کے ضیاع ،املاک کی تباہی پردکھ ہے۔ترجمان دفتر خارجہ کا کہنا تھا کہ حکومت اور پاکستانی عوام متاثرہ لواحقین سے تعزیت کا اظہار کرتے ہیں اور زلزلے میں زخمی ہونیوالوں کی جلد صحت یابی کیلئے دعاگو ہیں۔

یاد رہے افغانستان کے صوبے بادغیس میں شدید زلزلہ آیا ،زلزلے کے باعث چھتیں مکانات گرنے سے بچوں اور خواتین سمیت چھبیس افراد جاں بحق ہوگئے۔امریکی جیولوجیکل سروے کے مطابق ریکٹر اسکیل پرزلزلے کی شدت پانچ اعشاریہ تین ریکارڈ کی گئی، جس کی گہرائی تیس کلومیٹر تھی۔صوبہ بادغیس حکومت کے ترجمان کا کہنا ہے کہ زلزلے سے سات سو سے زائد مکانات متاثر ہوئے، عوام کو کافی پریشانی کا سامنا ہے، ریسکیو کا کام جاری ہے۔