پاک فوج کے جوان مری سے گاڑیاں نکالنے میں رات بھر متحرک رہے:شہباز گل

?️ 9 جنوری 2022

اسلام آباد ( سچ خبریں ) وزیراعظم عمران خان کے معاون خصوصی ڈاکٹر شہباز گل نے کہا ہے کہ پاک فوج کے جوان مری سے گاڑیاں نکالنے میں رات بھر متحرک رہے، مری سے رات گئے 600 سے 700 گاڑیوں کو نکالا گیا ۔ راولپنڈی اسلام آباد سے مری سے  آنے والے راستوں پر پولیس موجود ہے‘ راستے آج بھی بند رہیں گے۔

تفصیلات کے مطابق سماجی رابطوں کی ویب سائٹ ٹوئٹر پر جاری کردہ اپنے ایک بیان میں انہوں نے کہا کہ مری کی تمام مرکزی شاہراہوں کو ٹریفک کیلئے کلیئر کر دیا گیا ہے ، مری سے رات گئے 600 سے 700 گاڑیوں کو نکالا گیا ، جس کے لیے راولپنڈی پولیس ، ضلعی انتظامیہ ،پاک فوج کے جوان اور ہمارے مقامی لوگ رات بھر متحرک رہے ، راولپنڈی اسلام آباد سے مری آنے والے راستوں پر پولیس موجود ہے ، راستے آج بھی بند رہیں گے۔

ادھر چیئرمین این ڈی ایم اے لیفٹیننٹ جنرل اختر نواز نے کہا ہے کہ مری میں پھنسے تمام سیاحوں کو ریسکیو کرلیا گیا ‘ 90 فیصد سڑکیں کھل گئیں، برف باری میں پھنسے تمام سیاحوں کو محفوظ مقامات پر بھیج دیا گیا ہے ، 371 افراد کو آرمی ریلیف کیمپوں میں منتقل کیا گیا ، جس کے لیے ریسکیو کا کام پاک فوج اور سول اداروں سب نے مل کر سرانجام دیا جب کہ سیاحوں کی منتقلی میں مقامی افراد نے بھی مدد کی ، جس کی بدولت سیاحوں کو رات سے قبل ہی محفوظ مقامات پر منتقل کردیا گیا۔

لیفٹیننٹ جنرل اختر نواز نے اے آر وائی نیوز سے گفتگو میں بتایا کہ کلڈانہ باڑیاں روڈ کھولنے کا کام جاری ہے ، اس سڑک پر 77 گاڑیاں پھنسی ہوئی ہیں تاہم جو گاڑیاں پھنسی ہیں ان میں سیاح نہیں ہیں، وہ گاڑیاں چھوڑ کر خود ہی محفوظ مقامات پر منتقل ہو گئے تھے، اب کلڈانہ باڑیاں کے علاوہ تمام سڑکیں کھول دی گئی ہیں۔