وزیر خزانہ نے  پاکستان کو کئی دیگر ممالک سے سستا قرار دے دیا

?️ 20 فروری 2022

اسلام آباد(سچ خبریں) ملک میں ایک طرف مہنگائی کا زور و شور ہے اور عوام کو پریشانیوں کا سامنا ہے تاہم  وفاقی وزیر خزانہ شوکت ترین کا کہنا ہے کہ رہائشی اعتبار سے پاکستان، 138 ممالک کی نسبت سستا ہے، رہائش کے لحاظ سے تمام ممالک میں پاکستان کا 139 واں نمبر ہے۔

تفصیلات کے مطابق وفاقی وزیر خزانہ شوکت ترین نے سماجی رابطے کی ویب سائٹ ٹویٹر پر مختلف ممالک کے رہائشی اعتبار سے متعلق سروے کا انڈیکس ٹویٹ کیا۔وزیر خزانہ کا کہنا ہے کہ 138 ممالک کی نسبت پاکستان رہائشی اعتبار سے سستا ہے، رہائش کے لحاظ سے تمام ممالک میں پاکستان کا 139 واں نمبر ہے۔

انہوں نے کہا کہ پاکستان میں رہنے کی لاگت، امریکا کے مقابلے میں اوسطاً 71.52 فیصد کم ہے، پاکستان میں کرایہ اوسطاً امریکا کے مقابلے میں 90.64 فیصد کم ہے۔وزیر خزانہ کا کہنا ہے کہ کراچی نیویارک سے 79.35 فیصد کم مہنگا ہے۔

دوسری طرف پاکستان میں مہنگائی کی شرح22 ماہ کی بلند ترین سطح پر پہنچ گئی، وفاقی ادارہ شماریات کا کہنا ہے کہ ہ پٹرولیم مصنوعات کی قیمتوں میں مسلسل اضافے کے ساتھ بنیادی اشیائے ضروریہ مہنگی ہو گئی ہیں، جس سے مہنگائی کی شرح 22 ماہ کی بلند ترین سطح پر پہنچ گئی ، دسمبر2020 میں افراط زر کی شرح8 فیصد رہی تھی اور چھ ماہ میں مہنگائی کی شرح 8.63 فیصد رہی تاہم سال2021 میں بھی مہنگائی کی شرح مسلسل بڑھتی رہی، نومبر2021 میں مہنگائی11.55 فیصد اور دسمبر میں مہنگائی کی شرح میں 12.3 فیصد کا اضافہ ہوا۔