وزیر اعظم کشمیر کاز کو مضبوط بنا رہے ہیں: فردوس عاشق

?️ 23 جولائی 2021

لاہور (سچ خبریں) وزیراعلیٰ پنجاب کی معاون خصوصی ڈاکٹر فردوس عاشق اعوان نے کہا ہے کہ کشمیر اور پاکستان لازم وملزوم ہیں، وزیر اعظم عمران کشمیر کاز کو مضبوط بنا رہے ہیں انہوں نے کشمیریوں کے لئے دنیا بھر میں آواز اٹھائی، کشمیر بنے گا پاکستان کے نعرے کو عملی تعبیر ملنے جارہی ہے۔

لاہور سے جاری کیے گئے بیان میں ڈاکٹر فردوس عاشق اعوان نے کہا کہ جعلی راجکماری نے کشمیر سے متعلق متنازع نعرے لگوا کر ناعاقبت اندیشی کا ثبوت دیا۔فردوس عاشق اعوان نے کہا کہ وزیراعظم عمران خان نے کشمیریوں کے لیے دنیا بھر میں آواز اٹھائی جبکہ اپوزیشن کی جماعتیں کشمیر الیکشن میں حکومت پر دھاندلی کا الزام لگارہی ہیں۔

اُنہوں نے کہ کہ جو بھی کشمیر گیا وہ حکومت پاکستان کو فتح کرنے گیا، کشمیر کو فتح کرنے کے بجائے حکومت پاکستان کو فتح کرنے کا عزم ظاہر کیا۔فردوس عاشق اعوان نے مزید کہا کہ وزیراعظم عمران خان کشمیر کاز کو مضبوط بنا رہے ہیں جبکہ اپوزیشن جماعتیں کشمیریوں کی جدوجہد کو نقصان پہنچا رہی ہیں۔

ان کا مزید کہنا تھا کہ وزیراعظم عمران خان کے وژن اور وزیراعلی عثمان بزدار کی قیادت میں پنجاب حکومت صحت کے شعبہ میں انقلاب برپا کر رہی ہے، پہلی مرتبہ انسانی اور سماجی شعبوں کی ترقی و خوشحالی پر پیسہ خرچ کیا جا رہا ہے، پی ٹی آئی حکومت نے شعبہ صحت میں اصلاحات متعارف کروا کر اہل پنجاب کے دل جیت لیے۔