وزیر اعظم نومبر میں برطانیہ کا دورہ کریں گے

24 اگست 2021

اسلام آباد (سچ خبریں ) وزیراعظم عمران خان کا نومبر کے پہلے ہفتے میں دورہ برطانیہ کا امکان ہے۔وزیراعظم کے دورے کے حوالے سے بھی تیاریاں شروع کر دی گئی ہیں۔۔وزیراعظم عمران خان دورہ برطانیہ کے دوران اسکاٹ لینڈ میں ہونے والی ماحولیاتی کانفرنس میں شرکت کریں گے۔وزیراعظم لندن میں انوسمنٹ کانفرنس میں شریک ہوں گے۔

لندن میں اوور سیز پاکستانیز کے بڑے اجتماع کی تیاریاں بھی کی جا رہی ہیں جس سے وزیراعظم عمران خان خطاب کریں گے۔اس سے قبل وزیراعظم نے جولائی میں برطانیہ کا دورہ کرنا تھا جو کہ ملتوی ہو گیا تھا۔، ذرائع نے بتایا کہ وزیراعظم عمران خان نے ملک کی داخلی ، سیاسی اور علاقائی صورتحال کے پیش نظر از خود برطانیہ نہ جانے کا فیصلہ کیا ، کیوں کہ وزیراعظم عمران خان نے فیصلہ کیا تھا کہ وہ خود افغانستان سے غیر ملکی افواج کے انخلا کی تکمیل کو مانیٹر کریں گے، وزیراعظم عمران خان کا رواں سال کے آخر میں دورہ برطانیہ شیڈول ہونے کا امکان ظاہر کیا گیا تھا۔

یاد رہے کہ وزیراعظم کو دورے کی دعوت برطانوی ہم منصب بورس جانسن نے دی تھی ، برطانوی وزیراعظم بورس جانسن نے وزیراعظم عمران خان کو پاک برطانیہ سیریز کا پہلا میچ دیکھنے کے لیے مدعو کیا گیا تھا ، جس کے لیے برطانیہ کے وزیراعطم بورس جانسن کی جانب سے ٹیلی فون کال پر وزیراعظم عمران خان کو دورہ برطانیہ کی دعوت دی گئی تھی ، بورس جانسن نے عمران خان کو پاکستان اور انگلینڈ کے مابین ہونے والے پہلے ون ڈے انٹریشنل کرکٹ میچ دیکھنے کے لیے مدعو کیا تھا۔

وزیراعظم کا دورہ ملتوی ہونے پر مختلف قسم کی قیاس آرائیاں بھی کی گئی تھیں تجزیہ کار ڈاکٹر دانش نے دعویٰ کیا تھا کہ وزیراعظم عمران خان نے کہا تھا کہ میں جس دن بھی برطانیہ اتروں گا ، نوازشریف کا وہاں سے بوریا بستر گول کرکے پاکستان لے کرآؤں گا لیکن برطانوی وزیراعظم نے عمران خان کی اس خواہش کو ردی کی ٹوکری میں پھینک دیا۔