نور مقدم کیس میں اہم پیشرفت مالی کا بیان سامنے آگیا

?️ 15 اگست 2021

اسلام آباد (سچ خبریں ) تفصیلات کے مطابق نور مقدم کیس میں مزید اہم پیش رفت ہوئی ہے جہاں مرکزی ملزم ظاہر جعفر کے گھر کے مالی جان محمد کا بیان سامنے آیا ہے ، جس میں اس کی طرف سے نورمقدم کے چھلانگ لگانے کی تصدیق کی گئی ، مالی نے پولیس کو بتایا کہ قتل سے پہلے نورمقدم کی چیخیں سنائی دے رہی تھیں۔
بتایا گیا ہے کہ اسلام آباد پولیس کو فوٹوگرامیٹری رپورٹ بھی موصول ہوگئی ہے ، جس میں سی سی ٹی وی کے اصلی ہونے کی تصدیق کی گئی ہے ، اس کے علاوہ رپورٹ میں ملزم ظاہرجعفر اور مقتولہ نور مقدم کی موجودگی کی بھی تصدیق کی گئی ہے ، قبل ازیں پولیس کو لاہور سے ڈی این اے رپورٹ بھی موصول ہوئی ، جس میں آلہ قتل پر ملزم کی انگلیوں کے نشانات کی تصدیق ہوئی۔

یاد رہے کہ 20 جولائی کو اسلام آباد میں تھانہ کوہسار کے علاقے سیکٹر ایف سیون فور میں نوجوان خاتون کو لرزہ خیز انداز میں قتل کردیا گیا تھا۔ خاتون کو تیز دھار آلے سے بہیمانہ انداز میں قتل کیا گیا ، لڑکی کا گلا کاٹنے کے بعد سر کاٹ کر جسم سے الگ کر دیا گیا تھا ، کیس میں اب تک پانچ ملزمان گرفتار ہیں جنہیں اڈیالہ جیل میں الگ الگ بیرکوں میں رکھا گیا ہے ، گذشتہ رات پولیس نے نورمقدم قتل کیس میں ملوث ایک اور ملزم گرفتار کیا تھا ، ملزم جان محمد ملزم ظاہر جعفر کے گھر پر مالی تھا، ملزم جان محمد واقعے کے بعد مانسہرہ فرار ہوگیا تھا، ملزم سے قتل کے بارے مزید اہم معلومات ریکارڈ کی گئی ہیں۔

بتایا گیا کہ نورمقدم قتل کیس کے مرکزی ملزم ظاہر جعفر کے والد ذاکر جعفر نے معاملے کو مبینہ طور پر نیا رنگ دینے کی کوشش کی ، ظاہر جعفر کے والد ساڑھے تین گھنٹے تک اپنے با اثر دوستوں سے قتل کے معاملے کو ڈکیتی کا رنگ دینے کی درخواست کرتے رہے ، ذاکر جعفر نے ساڑھے چھ سے ساڑھے نو بجے کے دورانیے میں چوبیس لوگوں سے رابطہ کیا، اُن میں سے کچھ لوگوں کا کانٹینٹ فونز سے حاصل کیا گیا۔