ملک بھر  میں کورونا وبا کی لہر شدت اختیار کر رہی ہے: وزیرخارجہ

2 اپریل 2021

اسلام آباد(سچ خبریں) وزیرخارجہ شاہ محمود قریشی کا کہنا ہے کہ پاکستان میں کورونا وبا کی تیسری لہر شدت اختیار کر رہی ہے جو بہت تشویشناک ہے موجودہ صورتحال سےسے نمٹنے کے لئے  ایس او پیز پر عمل درآمد لازمی ہے ، کورونا کا پھیلاؤ روکنے اور معاشی مضمرات سے نمٹنے کیلئے کام کررہے ہیں۔

تفصیلات کے مطابق وزیر خارجہ شاہ محمود قریشی سے برطانیہ میں مقیم پاکستانی نژاد طارق محمود نے ملاقات کی۔ اس موقع پر وبائی صورت حال سمیت باہمی دلچسپی کے امور پر تبادلہ خیال کیا گیا۔ وزیر خارجہ نے برطانیہ میں مقیم پاکستانی ڈاکٹرز، نرسز اور طبی عملے کی خدمات کو سراہا۔

ملاقات میں شاہ محمود قریشی کا کہنا تھا کہ ملک میں وبا کی تیسری لہر بڑھ رہی ہے۔ کورونا کا پھیلاؤ روکنے اور معاشی مضمرات سے نمٹنے کیلئے کام کررہے ہیں، مثبت نتائج سامنے آئیں گے۔انہوں نے مزید کہا کہ پاکستان میں کورونا سے بچاؤ کیلئے ویکسی نیشن کامیابی سے جاری ہے۔

خیال رہے کہ ملک میں کرونا وائرس کی صورت حال بگڑتی جارہی ہے، جس کے باعث حالت مزید خراب ہونے کا خدشہ ہے، نیشنل کمانڈ اینڈ آپریشن سینٹر کے کرونا وائرس کی تیسری لہر سے متعلق جاری کردہ اعداد و شمار سے بتایا گیا ہے کہ ملک میں کرونا سے مجموعی اموات کی تعداد 14 ہزار 613 ہوگئی۔

واضح رہے کہ پاکستان میں بچے بھی کورونا کا شکار ہو رہے ہیں اسی دوران لاہورمیں کورونا وائرس نے مزید تین بچوں کو اپنی لیپٹ میں لے لیا ہے، جن میں سے دو بچوں کو چلڈرن اسپتال میں داخل کرایا گیا ہے ، جس کے بعد چلڈرن اسپتال میں متاثرہ بچوں کی تعداد چودہ ہوگئی۔