قوم کا مستقبل بیٹیوں کی کامیابیوں میں جھلکتا ہے۔ بلاول بھٹو زرداری

?️ 11 اکتوبر 2025

اسلام آباد (سچ خبریں) چیئرمین پیپلز پارٹی بلاول بھٹو زرداری نے کہا ہے کہ قوم کا مستقبل بیٹیوں کی کامیابیوں میں جھلکتا ہے۔

بچیوں کے عالمی دن کے موقع پر چیئرمین پیپلز پارٹی بلاول بھٹو زرداری نے اپنے پیغام میں پاکستان سمیت دنیا بھر کی بچیوں کی ہمت، حوصلے اور ثابت قدمی کو زبردست خراجِ تحسین پیش کیا۔ انہوں نے کہا ہے کہ ہماری بیٹیاں ہمارا فخر اور ہمارا مستقبل ہیں اور ہر بیٹی کو بلا امتیاز تعلیم، صحت، تحفظ اور مواقع تک رسائی دینا پیپلز پارٹی کے مشن کا بنیادی ستون ہے۔

بلاول بھٹو نے کہا ہے کہ یہ وژن قائدِ عوام شہید ذوالفقار علی بھٹو کے نظریے اور شہید محترمہ بینظیر بھٹو کے خواب کی تعبیر ہے، جب ایک بچی تعلیم یافتہ اور بااختیار ہوتی ہے تو وہ صرف خود کو نہیں بلکہ پوری قوم کو بلند کرتی ہے۔ انہوں نے اس موقع پر عہد کیا کہ پیپلز پارٹی ایسا پاکستان تعمیر کرے گی جہاں ہر بیٹی کو سیکھنے، بڑھنے اور قیادت کرنے کی مکمل آزادی حاصل ہو۔

بلاول بھٹو نے مزید کہا ہے کہ قوم کا مستقبل اس کی بیٹیوں کی کامیابیوں میں جھلکتا ہے اور پیپلز پارٹی کا وژن ایک ایسا پاکستان ہے جہاں ہر بچی آزادی سے خواب دیکھ سکے اور برابری کے ساتھ اپنی منزل حاصل کر سکے۔