قانون اور آئین کی بالادستی صدر مملکت اولین ترجیح ہے۔ گورنر پنجاب

?️ 10 اکتوبر 2025

لاہور (سچ خبریں) گورنر پنجاب سردار سلیم حیدر خان نے کہا ہے کہ قانون اور آئین کی بالادستی صدر مملکت اولین ترجیح ہے۔

گورنر پنجاب سردار سلیم حیدر خان سے گورنر ہاؤس میں صدر مملکت کے قانونی مشیر عرفان قادر کی ملاقات ہوئی۔ اس موقع پر گفتگو کرتے ہوئے سردار سلیم حیدر نے کہا کہ ملک میں وفاقی اور صوبائی محتسب نے غریب عوام کو انصاف کی فراہمی میں گراں قدر خدمات سرانجام دیں۔

گورنر پنجاب سردار سلیم حیدر خان کا کہنا تھا کہ صوبائی محتسب روزانہ کی بنیاد پر ہزاروں سائلین کی دادرسی کر رہا ہے۔ انہوں نے کہا کہ پیپلز پارٹی نے ہمیشہ ملک اور جمہوریت کے لئے ہر قسم کی قربانی دی، پنجاب، سندھ، بلوچستان، خیبر پختونخوا تمام صوبے پاکستان کی اکائیاں ہیں۔

گورنر پنجاب نے کہا کہ پیپلز پارٹی تمام صوبوں کو برابری کی سطح پر دیکھتی ہے، پیپلز پارٹی نے اپنے دور حکومت میں کسی صوبے کو نظر انداز نہیں کیا۔ سردار سلیم حیدر خان کا کہنا تھا کہ صدر آصف علی زرداری نے ہمیشہ مفاہمت کی سیاست پر یقین رکھا، آصف علی زرداری نے اپنے مخالفین سے بھی اچھا سلوک کیا اور انتقامی سیاست کو دفن کر دیا۔

گورنر پنجاب نے کہا کہ پیپلز پارٹی اور ن لیگ اتحادی جماعتیں ضرور ہیں مگر پی پی اپنے جیالوں کے جذبات کو مجروح نہیں ہونے دے گی۔ سردار سلیم حیدر نے کہا کہ صدر مملکت نے جمہوریت اور ملکی ترقی کی خاطر تنقید کرنے والوں کے ساتھ مفاہمت کا راستہ اپنایا تاکہ ملکی ترقی کا سفر جاری رہ سکے۔