عمران ذاتی مفاد کیلئے کسی بھی حد تک جاسکتے، مذاکرات پر یقین نہیں رکھتے۔ خواجہ آصف

?️ 24 دسمبر 2025

اسلام آباد (سچ خبریں) وفاقی وزیر دفاع خواجہ آصف نے کہا ہے کہ عمران خان اپنی سیاست میں ذاتی مفاد کو ہمیشہ ترجیح دیتے ہیں اور وہ اس کے لیے کسی بھی حد تک جا سکتے ہیں۔

سماجی رابطوں کے پلیٹ فارم ایکس (سابقہ ٹوئٹر) پر جاری بیان میں خواجہ آصف نے کہا کہ وزیراعظم مسلسل پاکستان تحریکِ انصاف (پی ٹی آئی) کو مذاکرات کی دعوت دے رہے ہیں اور دعا ہے کہ یہ مذاکرات مثبت اور نتیجہ خیز ثابت ہوں، تاہم پی ٹی آئی کے لیڈر کے سیاسی ڈی این اے میں مذاکرات کی گنجائش موجود نہیں ہے۔

وزیر دفاع کے مطابق عمران خان نے اپنی پوری زندگی میں اول و آخر اپنے ذاتی مفاد پر توجہ مرکوز رکھی ہے، مذاکرات ہمیشہ کچھ لو اور کچھ دو کی بنیاد پر ہوتے ہیں لیکن عمران خان کسی اصول پرست شخصیت کے حامل نہیں بلکہ وہ 200 فیصد مفاد پرست ہیں اور ہر معاملے میں صرف اپنے فائدے کا سوچتے ہیں۔

خواجہ آصف نے مزید کہا ہے کہ عمران خان ذاتی منفعت کے لیے اصولوں اور انسانی رشتوں کو بھی نظر انداز کر سکتے ہیں۔