عمران خان کے بیٹوں کا والد کی رہائی کیلئے اقوام متحدہ سے رجوع

?️ 13 ستمبر 2025

نیو یارک: (سچ خبریں) پاکستان تحریک انصاف کے پیٹرن انچیف عمران خان کے بیٹوں نےاپنے والد کی رہائی کے لئے اقوام متحدہ سے رجوع کرلیا۔ میڈیا رپورٹس کے مطابق سلیمان اور قاسم خان نے اس حوالے سے اقوام متحدہ کے سپیشل نمائندہ برائے تشدد کے روبرو اپنے والد کیلئے اپیل دائر کی ہے، اس اپیل میں انہوں نے اپنے والد سے جیل میں روا رکھے جانے والے سلوک کی فوری تحقیقات کا مطالبہ کیا ہے۔

اپیل میں کہا گیا ہے کہ عمران خان کی قید کو عالمی قوانین کے خلاف قرار دیا جا چکا ہے، والد کو قید تنہائی، ناقص خوراک، طبی سہولتوں سے محرومی اور مسلسل نگرانی کا سامنا ہے، والد ایسی اذیت میں ہیں جو انسانی وقار کے منافی ہے، ایمنسٹی انٹرنیشنل اور امریکی محکمہ خارجہ نے بانی پی ٹی آئی کی صحت اور حفاظت پر تشویش ظاہر کی، جس کے پیش نظر اقوام متحدہ کے نمائندے کو فوری مداخلت اور رہائی کے لیے اقدامات کرنے پر زور دیا جاتا ہے۔

اسی سلسلے میں اپنے ایک بیان میں سابق وزیراعظم کے صاحبزادے قاسم خان کا کہنا ہے کہ میرے والد عمران خان جیل میں ہیں کیوں کہ وہ جمہوریت کے لیے کھڑے ہیں، جس کی بناء پر انہیں قید تنہائی میں رکھا جاتا ہے، ان کے ڈاکٹروں تک رسائی سے انکار کیا جاتا ہے اور اس کے وکلاء اور اہل خانہ سے ملنے پر پابندی ہے، اس کے ساتھ ساتھ ان کے خاندان کے افراد اور ان کے ہزاروں حامیوں کو اغواء یا فوجی عدالتوں کے سامنے گھسیٹا جا چکا ہے، یہ انصاف نہیں سیاسی انتقام ہے۔ انہوں نے کہا کہ پاکستان کی جمہوریت خطرے میں ہے اور میں انسانی حقوق اور جمہوریت پر یقین رکھنے والے تمام لوگوں سے مطالبہ کرتا ہوں کہ وہ ہمارے ساتھ کھڑے ہوں تاکہ عوام کی آواز سنی جائے اور قانون کی حکمرانی بحال ہو۔