عارف نظامی انتقال پر فواد چوہدری، عثمان بزدار کا اظہار افسوس

?️ 21 جولائی 2021

اسلام آباد(سچ خبریں) وفاقی وزیراطلاعات فواد چوہدری کا سینئر صحافی عارف نظامی کےانتقال پر اظہار افسوس کرتے ہوئے کہا ہے کہ کہنا ہے کہ یہ صحافت کیلئے بڑا نقصان ہے، ان کی رحلت سے پاکستان کی صحافت کا بڑا باب بند ہو گیا ہے، عارف نظامی عارضہ قلب میں مبتلاتھے۔

فواد چوہدری نے اپنے ویڈیو پیغام میں کہا کہ عارف نظامی صدر سی پی این ای اور پاکستان کی صحافت کا لازمی حصہ تھے،صحافتی حلقوں میں عارف نظامی کو قدر کی نگاہ سے دیکھا جاتا تھا، ان کی رحلت سے پاکستان کی صحافت کا بڑا باب بند ہو گیا ہے۔ مرحوم کے ساتھ ہمارا ذاتی تعلق تھا، میرے دادا اور تایا کی عارف نظامی کے والد حمید نظامی صاحب سے گہری دوستی تھی۔

وفاقی وزیر نے بتایا کہ ان کے والد حمید نظامی نوائے وقت کے بانی تھے، نوائے وقت کا پاکستان کی تحریک آزادی میں صف اول کا کردار تھا، میرے دادا چوہدری اویس اور تایا چوہدری الطاف بھی تحریک آزادی کے اہم اور سرگرم کارکن تھے۔

فواد چوہدری نے مزید کہاکہ دکھ کی اس گھڑی میں پوری صحافی برادری بالخصوص مرحوم کے اہلخانہ سے اظہار افسوس کرتا ہوں۔واضح رہے کہ عارف نظامی عارضہ قلب میں مبتلا تھے اور گزشتہ 2 ہفتوں سے مقامی اسپتال میں زیر علاج تھے۔

دوسری جانب زیراعلیٰ پنجاب عثمان بزدار کا سینئرصحافی عارف نظامی کےانتقال پر کہنا ہے کہ آج صحافت کا روشن اور تاریخ ساز عہد ختم ہوگیا ۔عثمان بزدار نے اپنے بیان میں کہا کہ عارف نظامی کے انتقال پر دکھ کا اظہار کیا اور کہاکہ جمہوریت ، جمہوری اقدار کے فروغ کیلئےعارف نظامی کاعزم غیر متزلزل تھا۔انہوں نے کہاکہ عارف نظامی کے انتقال سے پیدا ہونے والا خلا کبھی پُر نہیں ہوسکتا،مرحوم کی صحافت کیلئے خدمات کو یاد رکھا جائے گا۔