ضمنی الیکشن میں بائیکاٹ کرکےتحریک انصاف اپنا نقصان کرےگی۔ عطا تارڑ

?️ 8 اگست 2025

اسلام آباد (سچ خبریں) وفاقی وزیر اطلاعات و نشریات عطا تارڑ نےکہا ہے کہ ضمنی الیکشن میں بائیکاٹ کرکے تحریک انصاف اپنا نقصان کرے گی۔

تفصیلات کے مطابق عطا تارڑ نے کہا ہے کہ نو مئی کے واقعات پر کسی کو معاف نہیں کیا جاسکتا، ٹرائل، شواہد کے بعد نااہلیاں ہوئی ہے۔ انہوں نے کہا کہ کسی کے عہدے پر ہونے سے جرم ختم نہیں ہوجاتا، نو مئی ایک گھناؤنا جرم تھا اس وجہ سے قومی اسمبلی اور سینیٹرز کے اراکین کو نااہل قرار دیا گیا، ایک جرم ہوا ہے اس کی سزا تو ملے گی، عمر ایوب اور دیگر کی نااہلی 9 مئی پر ہوئی ہے۔

وفاقی وزیر اطلاعات و نشریات کا کہنا تھا کہ تحریک انصاف اندرونی انتشار کا شکار ہے، تحریک انصاف کے اندر گروپنگ ہے، علی امین گنڈا پور اور جنید اکبر گروپ ہے، علیمہ خان اور شیر افضل مروت گروپ ہے، جب اتنے گروپس ہوں گے تو پھر پارٹی پالیسی کلیئر نہیں ہوتی۔ عطا تارڑ نے کہا کہ جب پارٹی پالیسی کلیئرنہ ہو تو پھر لوگ کنفوژن شکار ہوتے ہیں، ان کے پاس سٹریٹ پاور نہیں اور لوگ نکل نہیں رہے، تحریک انصاف کے تمام احتجاج بری طرح ناکام ہوئے۔

ان کا کہنا تھا کہ تحریک انصاف کی احتجاج کی حکمت عملی ناکام رہی ہے، یہ ہر قومی تہوار پر ہی کیوں احتجاج کرتے ہیں؟ یوم استحصال کشمیرڈے والے دن بھی تحریک انصاف نے احتجاج کیا، ایرانی صدر پاکستان آئے تب احتجاج کی کال دی تھی۔ وفاقی وزیر اطلاعات ونشریات نے تجویز دیتے ہوئے کہا کہ چودہ اگست کو احتجاج کا اعلان بڑا افسوس ناک ہے، تحریک انصاف 15 اگست کو احتجاج کرے تاکہ بھارت کو پیغام جائے۔

عطا تارڑ کا کہنا تھا کہ ضمنی الیکشن میں بائیکاٹ کرکے تحریک انصاف اپنا نقصان کرے گی، سیاسی میدان کبھی خالی نہیں چھوڑا جاتا، تحریک انصاف کے ساتھ پارلیمان کے اندر بات چیت ہونی چاہیے، ہم نے ہمیشہ مذاکرات کی بات کی، انہوں نے راہ فرار اختیار کی۔