صدر آصف علی زرداری کی یو اے ای کے صدر شیخ محمد بن زاید النہیان سے ملاقات، تعلقات مزید مضبوط بنانے پر اتفاق

?️ 28 جنوری 2026

اسلام آباد (سچ خبریں) صدرِ مملکت آصف علی زرداری نے متحدہ عرب امارات کے سرکاری دورے کے دوران صدرِ یو اے ای شیخ محمد بن زاید النہیان سے ملاقات کی۔ ملاقات میں پاکستان اور متحدہ عرب امارات کے مابین دیرینہ، برادرانہ تعلقات کو مزید مضبوط بنانے پر تفصیلی گفتگو کی گئی۔

دونوں رہنماؤں نے دوطرفہ تعاون کے تمام پہلوؤں کا جائزہ لیا اور تجارت، سرمایہ کاری، توانائی، انفراسٹرکچر، ٹیکنالوجی اور عوامی روابط سمیت مختلف شعبوں میں تعاون بڑھانے کے امکانات پر تبادلہ خیال کیا۔ اس موقع پر اقتصادی اور اسٹریٹجک شراکت داری کو مزید وسعت دینے کی صلاحیت پر بھی زور دیا گیا۔

صدر آصف علی زرداری نے حالیہ دورہ پاکستان پر شیخ محمد بن زاید النہیان کا خصوصی ذکر کرتے ہوئے دوطرفہ تعلقات کے فروغ میں متحدہ عرب امارات کی مسلسل حمایت کو سراہا۔ دونوں فریقین نے علاقائی اور عالمی صورتحال پر بھی تبادلہ خیال کیا اور خطے میں امن، استحکام اور پائیدار ترقی کے لیے مشترکہ عزم کا اعادہ کیا۔

صدر زرداری کا یہ دورہ پاکستان اور متحدہ عرب امارات کے درمیان گہری دوستی اور اسٹریٹجک شراکت داری کا مظہر قرار دیا جا رہا ہے۔ ملاقات میں خاتونِ اول بی بی آصفہ بھٹو زرداری، چیئرمین پاکستان پیپلز پارٹی بلاول بھٹو زرداری، وفاقی وزیر داخلہ و انسدادِ منشیات محسن نقوی اور پاکستان کے سفیر برائے متحدہ عرب امارات بھی موجود تھے۔