صحت کے اخراجات حکومت اٹھا رہی ہے: فواد چوہدری

?️ 2 جنوری 2022

اسلام آباد(سچ خبریں)وفاقی وزیر اطلاعات فواد چوہدری نے کہا ہے صحت کے اخراجات اب لوگوں کے بجٹ کا حصہ نہیں رہے،  صحت کارڈ پروگرام کے بعد لوگوں کی صحت کے اخراجات مکمل طور پر حکومت اٹھا رہی ہے۔لاہور کے مختلف علاقوں میں صحت کارڈ کی سہولت مکمل طور پر میسر ہو گئی ہے۔

تفصیلات کے مطابق سماجی رابطے کی ویب سائٹ ٹوئٹر پر اپنے بیان میں فواد چوہدری کا کہنا ہے کہ صحت کے اخراجات اب لوگوں کے بجٹ کا حصہ نہیں رہے۔انہوں نے کہا کہ لاہور ڈویژن میں صحت کارڈ کی سہولت مکمل طور پر میسر ہو گئی ہے۔فواد چوہدری کا یہ بھی کہنا تھا کہ آئندہ 45 دنوں میں پنجاب کا ہر خاندان صحت کارڈ سے 10 لاکھ تک سالانہ علاج کا اہل ہو گا۔

دوسری جانب صوبہ پنجاب کی وزیر صحت ڈاکٹر یاسمین راشد نے عوام کو صحت کارڈ کے حصول کیلئے ضروری شرائط بتادیں ہیں۔ انہوں نے کہا کہ پنجاب میں ہیلتھ کارڈ کا اجرا تیزی سے جاری ہے ، صحت کارڈ کے حصول کے لئیے نادرا میں رجسٹر ہونا لازمی ہے ، بچوں کا نادرا میں اندراج ہونا بھی ضروری ہے ، نادرا میں رجسٹر ہوئے بغیر صحت کارڈ نہیں ملے گا۔

صوبائی وزیر صحت نے کہا کہ صحت کارڈ سہولت کے لیے ہم نے ایک موبائل ایپ بھی بنائی ہے ، جس کے ذریعے عوام کو تمام معلومات مل سکیں گی کیوں کہ پنجاب کے ہر خاندان کو صحت کارڈ فراہم کرنا ہماری ترجیح ہے ، صحت کارڈ کے لیے نادرا کے دفاتر سے رابطہ کیا جائے ، اگر کسی فرد کا شناختی کارڈ نہیں بنا تو وہ لازمی بنوالیں اور جن افراد کے بچے ہیں وہ اپنے بچوں کا ب فارم ضرور بنوائیں۔