شہباز شریف وزیراعظم بننے کے خواب دیکھ رہے ہیں:شہباز گل

?️ 7 جنوری 2022

اسلام آباد(سچ خبریں) وزیراعظم کے معاون خصوصی برائے سیاسی ابلاغ ،معاون خصوصی ڈاکٹر شہباز گل نے  شہباز شریف کے بیان پر ردعمل کا اظہار کرتے ہوئے کہا ہے کہ شریفوں کا پورا ٹبر لوٹ مار میں ضمانتی جبکہ ان کی شوبازیاں عروج پر ہیں، چھوٹے میاں روز  وزیراعظم بننے کے خواب دیکھ رہے ہیں۔

یہ بات انہوں نے ن لیگ کے رہنما میاں شہباز شریف کے بیان پر اپنے ردعمل میں کہی، ان کا کہنا تھا کہ اربوں کی منی لانڈرنگ کرنے والے ہمیں قانون پڑھا رہے ہیں۔معاون خصوصی نے کہا کہ شریفوں کا پورا ٹبر لوٹ مار میں ضمانتی جبکہ ان کی شوبازیاں عروج پر ہیں، کبھی اپنی منی لانڈرنگ کی تحقیقاتی رپورٹ بھی پڑھ لیا کیجیے۔

شہبازگل کا کہنا تھا کہ بیٹوں سے مل کر بلیک منی کو وائٹ کرانا چھوٹے میاں کا مشغلہ رہا ہے، آج میڈیا پر انصاف کی دہائیاں دینے والے قانون کے بھگوڑے بنے ہوئے ہیں۔انہوں نے کہا کہ قانون کو جوتے کی نوک پر رکھنے والا آل شریف آج مکافات عمل کا شکار ہے، سرٹیفائیڈ جھوٹے، جعل سازوں کا وزیراعظم کی کرسی ہتھیانا محض ایک خواب ہے۔

معاون خصوصی نے کہا کہ چھوٹے میاں روز وزیراعظم بننے کے خواب دیکھ رہے ہیں، جعل ساز و مکار کبھی اس کرسی پر نہیں بیٹھ پائیں گے۔ ڈاکٹر شہباز گل نے مزید کہا کہ وزیراعظم عمران خان کو اعلیٰ عدلیہ نے صادق اور امین قرار دیا ہے۔