سندھ کی حکومت نے وزیر اعظم سے شکوہ کیا

🗓️ 11 اگست 2021

کراچی (سچ خبریں) سندھ حکومت نے شکوہ کرتے ہوئے کہا کہ وزیر اعظم عمران خان کے دورے میں ہمیں نظرانداز کیا گیا۔ ترجمان سندھ حکومت کے مطابق کراچی ٹرانسفارمیشن پروگرام کا بڑا حصہ سندھ حکومت کا ہے، اجلاس میں گورنر اور وفاقی وزرا سمیت ایس آئی ڈی سی ایل حکام شریک ہوئے جب کہ وزیر اعظم کے دورہ کراچی میں وزیر اعلیٰ سندھ مراد علی شاہ کو پھر نظر انداز کردیا گیا۔
جبکہ نجی ٹی وی چینل کے پروگرام میں بات کرتے ہوئے وزیر بلدیات سندھ ناصر حسین شاہ نے شکوہ کیا ہے کہ وزیراعظم عمران خان نے کراچی کے دورے میں وزیر اعلیٰ مراد علی شاہ کو نہیں بلوایا۔

ناصر حسین شاہ نے کہا کہ وزیراعظم عمران خان نے دورہ کراچی کے موقع پر وزیراعلیٰ سندھ مراد علی شاہ کو نظرانداز کیا۔ جبکہ ذرائع کے مطابق وزیر اعلیٰ سندھ مراد علی شاہ وزیر اعظم عمران خان کا استقبال کرنے ایئرپورٹ بھی نہیں گئے، اس حوالے سے ایڈمنسٹریٹر کے ایم سی سندھ حکومت کے ترجمان و مشیر قانون و بیرسٹر مرتضیٰ وہاب نے کہا کہ وزیر اعظم کی آمد کے حوالے سے مجھے یا وزیر اعلیٰ سندھ کو کوئی آگاہی نہیں تھی وزیر اعظم کی کراچی کی ترقی کے حوالے سے کوئی اجلاس نہیں تھا۔

سندھ حکومت کے شکوے شکایتیوں پر گورنر سندھ عمران اسماعیل نے کہا کہ وزیراعظم جب بھی کراچی آتے ہیں تو سب کو ائیر پورٹ آنے سے منع کرتے ہیں، اگر وزیر اعلیٰ سندھ کی خوشی ائیرپورٹ آنے میں ہی ہے تو میں وزیراعظم سے درخواست کروں گا کہ انہیں ضرور بلا لیا کریں، چاہے ہمیں بلائیں یا نہ بلائیں۔ یاد رہے کہ گذشتہ روز وزیراعظم عمران خان نے کراچی کا ایک روزہ دورہ کیا تھا، جہاں وزیراعظم کو کراچی ٹرانسفارمیشن پلان کے ترقیاتی منصوبوں پر بریفنگ دی گئی تھی۔ دورہ کراچی کے دوران وزیراعظم عمران خان نے وزیراعظم عمران خان نے شپ یارڈ میں شپ لفٹ اینڈ ٹرانسفر سسٹم کا افتتاح بھی کیا تھا۔