سندھ میں اومیکرون کے کیسز میں اضافہ ہو رہا ہے

?️ 9 جنوری 2022

کراچی(سچ خبریں) سندھ میں اومی کرون ویرینٹ کے کیسز میں اضافہ ہونے لگا۔ چھ سے سات جنوری کے دوران مزید اکیس افراد میں مہلک وائرس کی تصدیق ہوئی۔وزیر اعلی سندھ مراد علی شاہ نے کراچی سمیت سندھ میں اومی کرون کے بڑھتے ہوئے کیسز کی حواے سے خبردار کر دیا۔ انہوں نے کہا کہ سندھ میں اومی کرون کیسز کی تعداد میں تیزی سے اضافہ ہو رہا۔

انہوں نے کہاکہ 6سے 7جنوری 2022 تک 24 ٹیسٹ کیے گئے۔24 نمونوں میں سے اومی کرون کے 21 کیسز رپورٹ ہوئے۔ 21کیسز میں سے 14 ضلع شرقی ، 3 وسطی، 1 ملیر اور 3 کا تعلق دیگرصوبے کے دیگر اضلاع سے ہے۔انہوں نے بتایا ہے کہ 24 ٹیسٹوں میں سے 21 کیسز کا مثبت آنا کورونا کیسز میں اومی کرون ویریئنٹ کی 87.5 فیصد کی شرح کو ظاہر کرتی ہے۔
دوسری جانب کراچی کے جناح انٹرنیشنل ایئرپورٹ پرمتحدہ عرب امارات جانے والے مسافروں کو پرواز کی روانگی سے 4 گھنٹے قبل ریپڈ انٹیجن ٹیسٹ کئے گئے تھے۔

چوبیس گھنٹوں کے دوران مسافروں کے ریپڈ ٹیسٹ کئے گئے تو ان میں مجموعی طور 36 مسافروں میں کورونا وائرس کی تشخیص ہوئی۔ اس حوالے سے سول ایوی ایشن ذرائع نے کہا کہ مذکورہ تمام مسافروں کو سفر کی اجازت نہیں دی گئی، مثبت آنے والے مسافروں کو قرنطینہ کے لیے مختلف اسپتالوں میں منتقل کردیا گیا ہے۔ دوسری جانب وزیراعلیٰ سندھ سد مراد علی شاہ اور وزیر صحت سندھ نے کراچی ائیرپورٹ پر مانیٹرنگ مزید سخت کرنے کے احکامات بھی جاری کر دیے ہیں۔

یہاں یہ بات قابل ذکر ہے کہ ملک میں کورونا وائرس کے پھیلاؤ میں مزید شدت دیکھنے میں آئی جبکہ کورونا وائرس کے نئے ویرئینٹ اومی کرون کے پھیلاؤ میں بھی شدت سے اضافہ ہو رہا ہے۔ کراچی میں کورونا کی شرح 9 فیصد سے تجاوز کر گئی ہے جس کے پیش نظر شہریوں کو حفاظتی اقدامات کرنے اور ماسک پہننے کے ساتھ ساتھ سماجی فاصلہ قائم رکھنے کی ہدایات بھی کی گئی ہیں۔