خانیوال کے حلقہ پی پی 206 کے ضمنی انتخابات کے غیر سرکاری نتائج سامنے آگئے

?️ 16 دسمبر 2021

خانیوال (سچ خبریں)  تفصیلات کے مطابق خانیوال کے حلقہ پی پی 206 کے ضمنی انتخاب میں غیرحتمی اور غیرسرکاری نتیجے کے تحت20 پولنگ اسٹیشنز کا نتیجہ آگیا ہے، جس میں ن لیگی امیدوار نے اپنے مدمقابل پی ٹی آئی امیدوار پر برتری حاصل کرلی ہے۔
مسلم لیگ ن کے امیدوار رانا محمد سلیم4 ہزار740 ووٹ لے کر آگے اور پی ٹی آئی امیدوار نورین نشاط ڈاہا3 ہزار537 ووٹ لے کر پیچھے ہیں،تحریک لبیک کے شیخ محمد اکمل 1426 ووٹ لے کر تیسرے نمبر پر اور پیپلزپارٹی کے امیدوا رسید واثق چوتھے نمبر پر ہیں۔

ضمنی انتخاب کے لیے پولنگ کا عمل صبح 8 بجے شروع ہوا، اور شام 5 بجے تک جاری رہا، حلقے میں 183 پولنگ اسٹیشن بنائے گئے ہیں، پولنگ کیلئے 2 لاکھ 30 ہزار 698 ووٹرز نے اپنا حق رائے دہی استعمال کیا، پولنگ سٹیشن پر پولیس کے ساتھ رینجرز اہلکاروں نے بھی سیکورٹی کے فرائض سر انجام دیئے۔

دوسری جانب خانیوال کے حلقہ پی پی 206 کے ضمنی الیکشن کیلئے پولنگ کا وقت ختم ہوگیا ہے، جبکہ ووٹوں کی گنتی کا عمل جاری ہے۔ الیکشن میں تحریک انصاف کی امیدوار نورین نشاط ڈاہا اور مسلم لیگ ن کے امیدوار رانا محمد سلیم مدمقابل ہیں۔ الیکشن کیلئے پولنگ کے دوران جب انتخابی امیدوار نورین نشاط ڈاہا ووٹ کاسٹ کرنے آئیں تو پی ٹی آئی امیدوارنورین نشاط ڈاہا نے اپنا ووٹ شو کرنے پر ضائع کردیا۔
واضح رہے الیکشن کمیشن نے پولنگ اور انتظامی امور سے متعلق ہدایات جاری کی تھیں کہ پری زائیڈنگ آفیسر ریٹرننگ آفیسر سے پولنگ بیگ وصول کرے گا، پولیس کے ساتھ رینجرز اہلکار پریذائیڈنگ افسران کو سکیورٹی فراہم کریں گے، سکیورٹی اہلکار انتخابی عمل کے مکمل ہونے تک پولنگ سٹاف کے ہمراہ رہیں گے، حلقے میں کل 183 پولنگ سٹیشنز قائم کیے گئے ہیں۔
الیکشن کمیشن کے مطابق پریذائیڈنگ افسران پولنگ کے دن فارم 45 کی تصویر کھنچتے وقت موبائل پر اپنی لوکیشن آن رکھیں گے، پریذائیڈنگ افسران پولنگ ایجنٹس کے سامنے فارم 45 کی تصویر لیں گے، پریذائیڈنگ افسران فوراً فارم ریٹرننگ افسر کو واٹس ایپ کریں گے، انٹرنیٹ کی سہولت نہ پر پریذائیڈنگ افسر فوراً ریٹرنگ افسر کے دفتر پہنچ کر فارم جمع کرایں گے۔