حکومت کی توجہ برآمدی صنعتوں کے لیے سرمایہ کاری بڑھانے پر ہے: وزیر اعظم

?️ 27 دسمبر 2021

اسلام آباد(سچ خبریں)وزیر اعظم عمران خان کا کہنا ہے کہ زراعت کو کسانوں کی مدد اور زیادہ پیداوار والے شعبے میں تبدیل کر رہے ہیں، حکومت کی توجہ برآمدی صنعتوں کے لیے سرمایہ کاری بڑھانے پر ہے، حکومت کا مقصد پچھلے سال کے مقابلے میں زیادہ پیداوار حاصل کرنا ہے۔

تفصیلات کے مطابق وزیر اعظم عمران خان کی زیر صدارت ترجیحی شعبوں پر جائزہ اجلاس ہوا، اجلاس میں ایگری کلچر ٹرانسفارمیشن پلان اور خصوصی اقتصادی زونز پر عملدر آمد کا جائزہ لیا گیا۔وزیر اعظم عمران خان کا کہنا تھا کہ حکومت نے پہلی بار جامع ایگری کلچر ٹرانسفارمیشن پلان بنایا، حکومت اس پلان کو ترجیحی بنیادوں پر نافذ کر رہی ہے۔

انہوں نے کہا کہ زراعت کو کسانوں کی مدد اور زیادہ پیداوار والے شعبے میں تبدیل کر رہے ہیں، کسان کارڈ، کھاد پر سبسڈی اور مویشیوں کی جینیاتی بہتری حکومتی مقصد ہے۔ حکومت کا مقصد پچھلے سال کے مقابلے میں زیادہ پیداوار حاصل کرنا ہے۔

وزیر اعظم کا کہنا تھا کہ حکومت کی توجہ برآمدی صنعتوں کے لیے سرمایہ کاری بڑھانا ہے۔انہوں نے مزید کہا کہ کاروبار کرنے میں آسانی پر توجہ کے مثبت نتائج سامنے آنا شروع ہوگئے، سرمایہ کاروں کا اعتماد حکومت نے مؤثر پالیسی اقدامات سے حاصل کیا۔