ججزکا مقصد انصاف فراہم کرنا ہے، ذاتی انا کی تسکین نہیں۔ اعظم نذیر تارڑ

?️ 8 جنوری 2026

اسلام آباد (سچ خبریں) وفاقی وزیر قانون اعظم نذیر تارڑ نے کہا ہے کہ آئینی ترمیم کے بعد انصاف کی فراہمی کو جلد ممکن بنانے کی کوشش کی گئی ہے اور ججز کو انصاف پسند ہونا چاہیے۔

انہوں نے واضح کیا کہ ججز عدالت میں انصاف فراہم کرتے ہیں نہ کہ شاہی دربار میں اور ان کا کام ذاتی انا کی تسکین نہیں بلکہ عوام کے حقوق کے تحفظ کو یقینی بنانا ہے۔ اعظم نذیر تارڑ نے کہا کہ بارکی سیاست خدمت کی ہونی چاہیے اور معصوم بچوں کو ڈھال بنا کرجلسے نہیں کیے جانے چاہئیں۔

انہوں نے اپوزیشن پر زور دیا کہ پارلیمنٹ میں بیٹھ کرمسائل کا حل نکالیں اور ایک شخص کے مفاد کے بجائے عوام کے مسائل پر توجہ دیں۔ وزیر قانون نے خیبرپختونخوا کے صوبے کا حوالہ دیتے ہوئے کہا کہ یہ دہشتگردی سے سب سے زیادہ متاثر ہے اور عوام کی حفاظت کے لیے سب کا تعاون ضروری ہے۔

انہوں نے کہا کہ ایک شخص کو سزا ملی ہے تو رجوع عدالت سے کیا جائے اور کہا کہ کبھی دارلخلافہ پر چڑھائی نہیں کی گئی۔ اعظم نذیرتارڑ نے ملک کی بہتری اورخوشحال پاکستان کے قیام کے لئے سب کو مل کرکام کرنے کی ضرورت پر زور دیا اور بتایا کہ ینگ لائرزکیلئے اسٹیٹ آف دی آرٹ ٹریننگ سینٹر قائم کیا جائے گا۔