تحریک لبیک کالعدم ہو چکی، حکومت اپنے فیصلہ پر قائم ہے: وزیر داخلہ

1 مئی 2021

اسلام آباد (سچ خبریں) وفاقی وزیر داخلہ شیخ رشید کا کہنا ہے کہ تحریک لبیک پاکستان کالعدم ہو چکی ہے،حکومت اپنے فیصلہ  پر قائم ہے۔آئین اور قانون کے مطابق کاروائی کی جائے گی،عید کے بعد ہم کمیٹی قائم کریں گے یہ کمیٹی جو بھی فیصلہ کرے گی حکومت اس کی پابند ہوگی۔

وزیر داخلہ کا کہنا تھا کہ وزیراعظم کی ہدایت ہے کہ آئین و قانون کے مطابق کارروائی کی جائے اور سرینڈر نہ کیا جائے۔شیخ رشید نے مزید کہا کہ جس پارٹی کو کالعدم قرار دیا جاتا ہے اس پارٹی کے پاس جواب جمع کرانے کے لیے 30 دن ہوتے ہیں، اس کے بعد حکومت کے پاس اپیل سننے کے لیے 30 دن ہوتے ہیں۔

عید کے بعد 30 دن کے اندر ہمیں کمیٹی قائم کریں گے یہ کمیٹی جو بھی فیصلہ کرے گی حکومت اس کی پابند ہوگی۔انہوں نے کہا کہ تحریک لبیک اپنے وکلاء کے ساتھ کمیٹی میں پیش ہونا چاہیں تو ممکنہ وزارت داخلہ انہیں اجازت دے دے۔

قبل ازیں حکومت نے کالعدم تحریک لبیک پر پابندی کا جائزہ لینے کے لیے کمیٹی قائم کرنے کا فیصلہ کیا ہے۔وفاقی وزیر داخلہ شیخ رشید کی زیر صدارت کالعدم ٹی ایل پی سے متعلق مشاورتی اجلاس ہوا جس میں کالعدم تحریک لبیک پاکستان کی درخواست کا جائزہ بھی لیا گیا۔

واضح رہے کہ کالعدم تحریک لبیک نے پابندی کے خلاف حکومت کو درخواست دی ہے جس میں کہا گیا کہ تحریک لبیک دہشتگرد تنظیم نہیں بلکہ الیکشن کمیشن میں رجسٹرڈ سیاسی جماعت ہے، تحریک لبیک پر دہشتگردی کا الزام غلط ہے لہٰذا درخواست پر عمل کرتے ہوئے اس پر عائد پابندی ختم کی جائے۔ملک میں حالیہ احتجاج اور دھرنوں کے بعد حکومت نے تحریک لبیک پر پابندی عائد کرکے اسے کالعدم قرار دیا تھا۔