اپوزیشن کے پاس کوئی ایجنڈا نہیں ہے: وزیرِ اعلیٰ پنجاب

?️ 6 جون 2021

لاہور (سچ خبریں) پنجاب کے وزیرِ اعلیٰ سردار عثمان بزدار کا کہنا ہے کہ اپوزیشن کے پاس کوئی ایجنڈا نہیں ہے صرف سیاست  کر رہی ہے ، ڈھائی برس میں اپوزیشن کی ہرسازش ناکام رہی، سازشی عناصر پہلے اپنے دور کی لوٹ مار کا حساب دیں۔ہماری حکومت پہلے سے زیادہ مضبوط ہے۔

لاہور سے جاری کیئے گئے ایک بیان میں پنجاب کے وزیرِ اعلیٰ سردار عثمان بزدار نے کہا ہے کہ حکومت پہلے سے زیادہ مضبوط ہے۔انہوں نے کہا کہ حکومت گرانے کی خواہش رکھنے والوں کے ارمان 2023ء تک پورے نہیں ہوں گے۔

وزیرِ اعلیٰ پنجاب نے کہا کہ اپوزیشن کے پاس کوئی ایجنڈا نہیں، صرف نان ایشوز پر سیاست کی جا رہی ہے۔انہوں نے کہا کہ عوام کو کھوکھلے نعروں سے بہلانے کا دور گزر چکا ہے، سابق دور میں عوام کو ریلیف دینے کی بجائے تکلیف دی گئی۔

عثمان بزدار کا مزید کہنا ہے کہ تحریکِ انصاف کی حکومت عوام سے کیئے گئے وعدے نبھا رہی ہے۔اپنے بیان میں انہوں نے یہ بھی کہا ہے کہ ملک کو کنگال کرنے والوں کی سیاست ہمیشہ کیلئے ختم ہو چکی ہے۔

دوسری جانب وزیرِ اعلیٰ پنجاب سردار عثمان بزدار کی معاونِ خصوصی برائے اطلاعات ڈاکٹر فردوس عاشق اعوان کا کہنا ہے کہ کرپٹ اپوزیشن ٹولہ کسی غلط فہمی میں نہ رہے۔سماجی رابطے کی ویب سائٹ ٹوئٹر پر جاری کیئے گئے ایک بیان میں وزیرِ اعلیٰ پنجاب سردار عثمان بزدار کی معاونِ خصوصی برائے اطلاعات ڈاکٹر فردوس عاشق اعوان نے یہ بات کہی ہے۔

انہوں نے کہا ہے کہ عوام کرپٹ اپوزیشن ٹولے کے جھانسوں سے بہت دور جا چکے ہیں، معیشت سے مایوسی کے چھٹتے بادل اپوزیشن کی مایوسی اور بے بسی بڑھا رہے ہیں۔فردوس عاشق اعوان کا کہنا ہے کہ بلاشبہ حکومتی فیصلوں اور پالیسیز پر تعمیری تنقید اپوزیشن کا حق ہے، تاہم موجودہ اپوزیشن ذہنی پستی کی نئی حدوں کو چھوتی نظر آ رہی ہے۔سوشل میڈیا پر اپنے بیان میں انہوں نے مزید کہا ہے کہ معاشی و سفارتی محاذ پر تاریخی کامیابیاں اپوزیشن کے منہ پر زناٹے دار طمانچے ہیں۔