امریکا، چین تنازع حل کرنے میں پاکستان ثالثی کردار ادا کرنے کو  تیار ہے: فواد چوہدری

?️ 5 فروری 2022

اسلام آباد (سچ خبریں) وفاقی وزیر اطلاعات فواد چوہدری نے کہا ہےکہ امریکا اور چین کےدرمیان کافی کشیدگی چل رہی ہے اور دونوں ممالک کے درمیان تناؤ پایا جاتا ہے، پاکستان، امریکا اور چین کے درمیان تنازع حل کرنے میں ثالثی کردار ادا کرنے کو تیار ہے۔ دنیا ایک اور سرد جنگ کی متحمل نہیں ہو سکتی۔

وزیراعظم کے دورہ چین سے متعلق گفتگو کرتے ہوئے فواد چوہدری نے کہا کہ وزیراعظم عمران خان سے چین میں سرمایہ کاروں کی ملاقاتیں ہوئیں جس میں کراچی اور فیصل آباد میں پانی کے منصوبوں سے متعلق گفتگو ہوئی، کراچی میں کےفور منصوبہ،حب کینال جب کہ فیصل آباد میں واٹر ٹریٹمنٹ پلانٹ کے حوالے سے بات ہوئی۔

فواد چوہدری نے بتایا کہ وزیراعظم آج چینی صدرکےسربراہان مملکت کے اعزاز میں دیےگئے ظہرانے میں شرکت کریں گے، ان کی آج شام اقوام متحدہ کے سیکرٹری جنرل سے ملاقات ہوگی جب کہ وزیراعظم آج ازبکستان کے صدر اورچین کے وزیراعظم سے بھی ملیں گے۔

وزیر اطلاعات کا کہنا تھا کہ چین کے سرمائی اولمپکس میں پاکستان کی ٹیم پہلی مرتبہ شریک ہوئی جس کا چین کے عوام کی جانب سے والہانہ خیرمقدم کیا گیا، پاک چین دوستی دونوں ملکوں کے عوام کی ایک دوسرے کے لیے محبت کےاظہار پر ہے۔ْ

انہوں نے مزید کہا کہ وزیراعظم عمران خان کی تھنک ٹینکس سے بھی ملاقات ہوئی، وزیراعظم نے زور دیا کہ دنیا ایک اور سرد جنگ کی متحمل نہیں ہوسکتی، امریکا چین تنازع حل کرنے میں پاکستان کردار ادا کرنے کو تیار ہے۔