الیکشن کمیشن نے 2023 انتخابات کی تیاری شروع کر لی

?️ 29 دسمبر 2021

اسلام آباد (سچ خبریں) تفصیلات کے مطابق الیکشن کمیشن آف پاکستان نے عام انتخابات 2023ء کی تیاریاں شروع کر دی ہیں۔ اس مقصد کے لیے اہم اجلاس آج طلب کرلیا گیا ہے جس میں متعلقہ شعبوں کے افسران اور حکام شریک ہوں گے۔ میڈیا رپورٹ کے مطابق الیکشن کمیشن کی جانب سے عام انتخابات 2023ء کی تیاریاں شروع کر دی گئی ہیں، انتخابی عملے کے تربیتی ماڈیولز کا جائزہ لینے کے لیے اہم اجلاس آج طلب کرلیا گیا ہے۔

ذرائع کے مطابق اس اجلاس میں تربیت کے لیے استعمال مواد میں بہتری پر غور ہوگا۔ اجلاس میں متعلقہ شعبوں کے افسر اور متعلقہ حکام شریک ہوں گے، تمام صوبائی الیکشن کمشنر کے نمائندے بھی اجلاس میں شرکت کریں گے۔

خیال رہے کہ سال 2023ء کے عام انتخابات سے قبل حکومت نے مردم شماری کروانے کا فیصلہ بھی کر رکھا ہے۔ آئین کے مطابق ملک میں مردم شماری ہر 10 سال بعد ہونی چاہیے لیکن حکومت نے سال 2023ء کے انتخابات سے قبل نئی مردم شماری کرانے کا عزم ظاہر کیا ۔

میڈیا رپورٹس میں بتایا گیا کہ مردم شماری کے عمل میں فوج کی مدد لی جائے گی اور اس دوران سکیورٹی کو یقینی بنانے کے لیے تقریباً ڈھائی لاکھ مسلح افواج کے اہلکار پورے پاکستان میں تعینات کیے جائیں گے۔ آئندہ مردم شماری قانونی بنیادوں پر کی جائے گی جس میں ہر فرد کو ان خطوں میں شمار کیا جائے گا جہاں وہ گذشتہ چھ ماہ میں رہ رہے تھے۔ اگلی مردم شماری کمپیوٹر ٹیبلٹس پر مرتب کی جائے گی جس کے لیے حکومت ایک اندازے کے مطابق ایک لاکھ ڈیوائسز کی خریداری کا منصوبہ بنا رہی ہے۔ مردم شماری کے سوال نامے کو تفصیل سے پُر کرنے کے لیے تعلیم، صحت اور مقامی حکومتوں کے محکموں سے تقریباً چھ لاکھ شمار کنندگان کو تعینات کیا جائے گا۔