4 دن ڈیوٹی، 50 فیصد ورک فرام ہوم، ارکان پارلیمنٹ کی تنخواہوں میں 25 فیصد کٹوتی، آئندہ 2ماہ کابینہ ارکان کو تنخواہ نہ دینے کا اعلان

?️ 9 مارچ 2026

اسلام آباد (سچ خبریں) وزیراعظم شہبازشریف نے ارکان پارلیمنٹ کی تنخواہوں میں 25 فیصد کٹوتی، آئندہ 2 ماہ کابینہ ارکان کو تنخواہ نہ دینے کا اعلان کردیا۔

قوم سے خطاب کرتے ہوئے انہوں نے کہا کہ اس وقت مشرق وسطیٰ شدید جنگی صورتحال کی لپیٹ میں ہے، امن کو لاحق خطرات ہم سب کیلئے تشویش کا باعث ہیں، پاکستان کو مغربی سرحدوں پر بھی دہشت گردی کا سامنا ہے، فوج دہشتگردوں کی جانب سے ہونے والے حملوں کا جواب دے رہی ہے۔ ہماری افواج فیلڈ مارشل سید عاصم منیر کی قیادت میں دہشتگردی کے خلاف جنگ لڑ رہی ہیں۔ ہم اپنی بہادر مسلح افواج کو سلام پیش کرتے ہیں، مسلح افواج وطن عزیز کی جغرافیائی سرحدوں کے تحفظ کیلئے قربانیاں دے رہی ہے۔

انہوں نے مزید کہا کہ چاہتے ہیں مسائل کا حل سفارتکاری کے ذریعے نکالا جائے، معاملات تدبر اور سفارتکاری کے ذریعے حل کرنے کیلئے کوشاں ہیں، پاکستان پوری کوشش کررہا ہے کہ معاملات حل ہوں، پاکستان مشکل کی اس گھڑی میں تمام دوست ممالک کے ساتھ کھڑا ہے۔ ہم دوست ممالک کی سلامتی کو اپنی سلامتی سمجھتےہیں، سعودیہ، قطر، عمان اور یو اے ای میں ہونے والے حملوں کی مذمت کرتے ہیں، آذربائیجان، ترکیہ، بحرین اور کویت پر ہونے والے حملوں کی بھی مذمت کرتے ہیں۔ علی خامنہ ای اور ان کے اہل خانہ کی شہادت پر پاکستان گہرے دکھ کا اظہار کرتا ہے۔

وزیر اعظم کا خطاب کرتے ہوئے کہنا تھا کہ عالمی منڈی میں خام تیل کی قیمتیں بڑھ کر 100 ڈالر سے تجاوز کرگئیں، پیٹرولیم مصنوعات کی قیمتوں میں اضافہ کرنا بہت مشکل فیصلہ تھا، ہم نے سیاست کو پس پشت ڈال کر معیشت اور ریاست کو ترجیح دی، حکومتی اقدامات سے مہنگائی میں کمی اور روپیہ مستحکم ہوا۔ ہم وطنوں پر بوجھ کم کرنے کیلئے بہتر آپشن استعمال کیا، ہماری معیشت کا انحصار خلیج سے آنے والے تیل اور گیس پر ہے، موجودہ صورتحال کو دیکھتے ہوئے پاکستان نے مشکل فیصلے کیے، حالیہ دنوں میں تیل کی قیمتوں میں اضافہ موجودہ صورتحال کے باعث کیا گیا۔

کوشش ہوگی عوام پر کم سے کم بوجھ ڈالا جائے، عوام پر بوجھ نہ پڑے اس لیے حکومت نے درمیانی راستہ نکالا، آنے والے دنوں میں پیٹرولیم مصنوعات کی قیمتیں مزید بڑھیں گی، کوشش ہوگی آئندہ تیل کی قیمتوں میں اضافے کا بوجھ عوام پر نہ ڈالا جائے، پاکستان کو اس وقت اتحاد اور قومی یکجہتی کی ضرورت ہے۔