چیٹ جی پی ٹی کا سرچ انجن گوگل کی طرح استعمال کرنا ممکن

?️ 7 فروری 2025

سچ خبریں: آرٹیفیشل انٹیلی جنس (اے آئی) انٹرنیٹ ٹیکنالوجی کمپنی اوپن اے آئی نے اپنی سرچ انجن کا استعمال آسان بنادیا، جس کے بعد ہر صارف اسے گوگل کی طرح استعمال کر سکے گا۔

چیٹ جی پی ٹی نے اپنا سرچ انجن اکتوبر 2024 میں متعارف کرایا تھا، بعد ازاں اسے فیس کے عوض اچھے فیچرز کے ساتھ پیش کیا گیا تھا۔

اوپن اے آئی نے دسمبر 2024 میں اعلان کیا تھا کہ وہ اپنی سرچ انجن کو ہر کسی کے استعمال کے لیے مزید آسان بنانے پر کام کر رہی ہے۔

اور اب کمپنی نے اپنے سرچ انجن کو ہر کسی کے استعمال کے لیے آسان بناتے ہوئے اس پر اکاؤنٹ بنانے کی شرط ختم کردی۔

ٹیکنالوجی ویب سائٹ کے مطابق اب ہر کوئی چیٹ جی پی ٹی کے سرچ انجن کو ڈیسک ٹاپ پر کسی بھی ویب براؤزر میں کھول کر استعمال کر سکتا ہے۔

اب چیٹ جی پی ٹی کا سرچ انجن کسی سے اکاؤنٹ ہونے یا اکاؤنٹ میں لاگ ان کا نہیں پوچھتا بلکہ صارف اسے گوگل کی طرح استعمال کر سکتے ہیں۔

چیٹ جی پی ٹی کا دعویٰ ہے کہ اس کا سرچ انجن اے آئی ٹولز سے لیس ہے اور صارفین نہ صرف تحریری بلکہ وائس یعنی آواز میں بھی اس پر سرچنگ کر سکتے ہیں۔

یہاں یہ بات بھی قابل ذکر ہے کہ چیٹ جی پی ٹی کی جانب سے جہاں اب سرچ انجن کو آسان بنایا گیا ہے، وہیں کچھ دن قبل کمپنی نے چیٹ جی پی ٹی اے آئی بوٹ کا نیا ورژن بھی مفت میں متعارف کرایا تھا۔

چیٹ جی پی ٹی کی جانب سے چینی حریف کمپنی ڈیپ سیک آنے کے بعد متعدد فیچرز مفت شروع کیے جا رہے ہیں تاکہ وہ اپنی چینی حریف کمپنی کا مقابلہ کر سکے، کیوں کہ چینی کمپنی کے تمام فیچرز مفت ہیں۔