یوکرین کے لیے امریکی سیکورٹی کی ضمانت کیا ہے؟

یوکرین کے لیے امریکی سیکورٹی کی ضمانت کیا ہے؟

منگل کو امریکی چینل سی این بی سی نے رپورٹ کیا کہ واشنگٹن میں امریکی صدر ڈونلڈ ٹرمپ، یوکرینی صدر ولودیمیر زلنسکی اور یورپی رہنماؤں کی ملاقات مثبت ماحول میں ہوئی۔ اس اجلاس میں جنگ بندی اور ممکنہ صلح کے عمل پر بات چیت ہوئی اور ٹرمپ نے عندیہ دیا کہ وہ پوتین اور زلنسکی کے درمیان براہِ راست ملاقات کا اہتمام کریں گے۔

اہم پیش رفت یہ تھی کہ ٹرمپ نے یوکرین کے لیے سیکیورٹی گارنٹی کی بات کی جو یورپی ممالک کے تعاون اور امریکا کی ہم آہنگی سے دی جائے گی۔ تاہم اس ضمانت میں کیا شامل ہوگا، اس پر کوئی تفصیل سامنے نہیں آئی۔ ٹرمپ نے صرف اتنا کہا کہ یورپ زیادہ بوجھ اٹھائے گا لیکن امریکا بھی مدد کرے گا تاکہ یوکرین کو "محفوظ” بنایا جا سکے۔

فرانسیسی صدر ایمانوئل میکرون کے مطابق سب سے پہلی ضمانت ایک مضبوط یوکرینی فوج ہے جو جدید اسلحے اور دفاعی نظام سے لیس ہو۔ دوسری ضمانت یہ ہے کہ برطانیہ، فرانس، جرمنی، ترکی اور دیگر ممالک کے دستے محدود انداز میں زمینی، فضائی اور بحری آپریشنز کے لیے تیار ہوں تاکہ یہ پیغام دیا جا سکے کہ یورپ امن کے قیام کے لیے سنجیدہ ہے۔

چیتھم ہاؤس کی محقق یاروسلاوا باربیری نے کہا کہ اگرچہ مذاکرات میں محتاط خوش امیدی نظر آئی، لیکن اب بھی کئی سوالات کھلے ہیں؛ مثلاً یہ فوجی کہاں تعینات ہوں گے، کتنے عرصے کے لیے ہوں گے اور کون کون سے ممالک شامل ہوں گے۔

پہلا آپشن: مکمل پیس کیپنگ فورس جو ہزاروں فوجیوں پر مشتمل ہوگی اور دفاعی کردار ادا کرے گی۔

دوسرا آپشن: نسبتاً چھوٹا دستہ جو براہِ راست دفاع تو نہ کرے، لیکن روس کو اس خوف میں ڈالے کہ حملے کی صورت میں یورپی فوجیوں کو نشانہ بنانا پڑے گا۔

تیسرا آپشن: ایک محدود نگران فورس جو چند سو اہلکاروں پر مشتمل ہوگی اور جنگ بندی کی نگرانی کرے گی۔

امریکی اخبار نیویارک ٹائمز کے مطابق ٹرمپ نے واضح طور پر یہ وعدہ نہیں کیا کہ امریکی فوجی براہِ راست یوکرین بھیجے جائیں گے۔ ماہرین کے مطابق کسی بھی ممکنہ فورس کی تشکیل کا انحصار اس بات پر ہوگا کہ آیا روس اور یوکرین کے درمیان جنگ بندی یا امن معاہدے پر پیش رفت ہوتی ہے یا نہیں۔