یمنی حکومت کی مسجد الاقصی پر صیہونی حملے کی مذمت

?️ 30 مارچ 2023

سچ خبریں:صنعا میں یمن کی نیشنل سالویشن گورنمنٹ نے مسجد الاقصی پر صیہونی آباد کاروں اور فوجیوں کے حملے کی مذمت کرتے ہوئے عالمی برادری سے صیہونیوں کے جرائم کو روکنے کے لیے مداخلت کرنے کا مطالبہ کیا ہے۔

المسیرہ چینل کی رپورٹ کے مطابق یمن کی وزارت خارجہ نے قابض فوج کی حمایت سے مسجد الاقصی پر صیہونی آبادکاروں کے حملے کی مذمت کرتے ہوئے اسے اشتعال انگیز کاروائی قرار دیا ہے جس سے مقبوضہ فلسطینی علاقوں میں تشدد میں اضافہ ہوتا ہے۔

اس رپورٹ کے مطابق صنعاء میں یمن کی نیشنل سالویشن گورنمنٹ کی وزارت خارجہ نے ایک بیان جاری کر کے بیت المقدس میں اسلامی مقدس مقامات کی شناخت کو تبدیل کرنے کے لیے صیہونی حکومت کی مسلسل کوششوں کے بارے میں خبردار کیا ہے۔

یمن کی وزارت خارجہ نے اس بیان میں یمنی حکومت اور عوام کی جانب سے مسئلۂ فلسطین کی ہر طرح سے حمایت کرنے کے موقف پر تاکید کی اور اقوام متحدہ کی سلامتی کونسل، انسانی حقوق کونسل اور اسلامی تعاون تنظیم سے مطالبہ کیا کہ وہ مسئلۂ فلسطین کے تئیں اپنی ذمہ داری پوری کریں۔

انہوں نے مزید کہا کہ عالمی برادری کو چاہیے کہ صیہونیوں کے مسلسل اشتعال انگیز اقدامات کو روکنے کے لیے اور علاقے کے حالات کی خرابی کو ختم کرنے نیز تشدد کو روکنے کی کوشش کریں۔