ہمیں امید ہے کہ امریکہ وینزویلا کے ارد گرد کشیدگی بڑھانے سے باز رہے گا: روس

سچ خبریں: روسی وزرات خارجہ نے جمعرات کے روز جاری ایک بیان میں کہا کہ وینزویلا کے گرد تناؤ میں مسلسل اور جان بوجھ کر اضافہ کیا جا رہا ہے۔

ماسکو کو امید ہے کہ امریکہ وینزویلا کے معاملے پر کشیدگی میں اضافے سے گریز کرے گا، کیونکہ اس کے غیر متوقع نتائج برآمد ہو سکتے ہیں۔

روسی وزارت خارجہ کے بیان میں مزید کہا گیا کہ ہم نیکولس میدورو کے وینزویلا کے مفادات اور خودمختاری کے تحفظ کے لیے اقدامات کی حمایت کرتے ہیں۔ ماسکو ہمیشہ سے امریکہ اور وینزویلا کے درمیان مکالمہ کو معمول پر لانے اور کشیدگی کم کرنے کی کوششوں کی حمایت کرتا آیا ہے۔

امریکی حکومت، خاص طور پر ڈونلڈ ٹرمپ کے دور میں، نیکولس میدورو اور وینزویلا کے دیگر اعلیٰ عہدیداروں پر "منشیات کی اسمگلنگ” جیسے الزامات عائد کرتے ہوئے، کیراکاس حکومت کی قانونی حیثیت کو مشکوک بنانے اور اسے گرانے کے لیے قانونی و سیاسی جواز فراہم کرنے کی کوشش کرتی رہی ہے۔

واشنگٹن ان الزامات کو وینزویلا کے خلاف پابندیاں بڑھانے، اثاثے منجمد کرنے اور بین الاقوامی دباؤ میں اضافہ کرنے کے بہانے کے طور پر استعمال کرتا رہا ہے۔ میدورو حکومت ان تمام دعوؤں کو مکمل طور پر سیاسی اور بے بنیاد قرار دیتی ہے۔