کیا ٹرمپ اور نیتن یاہو کے اختلافات صرف میڈیا کا کھیل ہیں؟

کیا ٹرمپ اور نیتن یاہو کے اختلافات صرف میڈیا کا کھیل ہیں؟

امریکی اخبار وال اسٹریٹ جرنل نے اپنی ایک تازہ رپورٹ میں لکھا ہے کہ اگرچہ بظاہر ڈونالڈ ٹرمپ اور اسرائیلی وزیرِاعظم بنیامین نیتن یاہو کے درمیان بعض معاملات پر اختلافات دکھائی دیتے ہیں، لیکن ایک اعلیٰ اسرائیلی عہدیدار نے ان خبروں کو جعلی قرار دیتے ہوئے کہا ہے کہ دونوں رہنماؤں کے تعلقات مستحکم ہیں۔

امریکی ذرائع کے مطابق، ٹرمپ نے اپنے قریبی مشیروں کو بتایا ہے کہ نیتن یاہو جنگ بندی پر مذاکرات کے بجائے عسکری کارروائی پر زیادہ زور دیتے ہیں۔ ان اختلافات کی شدت اس وقت بڑھی جب اسرائیل نے قطر میں حماس کے مذاکراتی وفد پر حملہ کیا۔ ٹرمپ کا خیال ہے کہ اس اقدام نے مذاکراتی عمل کو تباہ کر دیا اور انہوں نے نیتن یاہو پر الزام لگایا کہ وہ ان کے ساتھ سیاسی کھیل کھیل رہے ہیں۔

دوسری جانب، ایک اسرائیلی اعلیٰ عہدیدار نے وال اسٹریٹ جرنل کو بتایا کہ تعلقات میں کشیدگی کی خبریں بے بنیاد ہیں اور حقیقت یہ ہے کہ واشنگٹن اور تل ابیب کے تعلقات مشترکہ اقدار اور مفادات پر قائم ہیں۔ نیتن یاہو کے دفتر کے سابق ترجمان نے بھی کہا کہ اختلافات کی خبریں ایک میڈیا اسکرپٹ ہیں جو مخصوص اسٹریٹجک مقاصد کے لیے تیار کیا گیا ہے۔

اسی دوران، امریکی ویب سائٹ آکسیوس نے تین اسرائیلی ذرائع کے حوالے سے دعویٰ کیا کہ نیتن یاہو نے قطر میں حماس کے رہنماؤں پر حملے سے پہلے یہ معاملہ ٹرمپ کو آگاہ کر دیا تھا۔ لیکن وائٹ ہاؤس کا مؤقف ہے کہ انہیں اس حملے کی اطلاع صرف اس وقت ملی جب راکٹ داغے جا چکے تھے اور صدر کے پاس مخالفت کا موقع ہی نہیں تھا۔ تاہم سات اسرائیلی حکام نے آکسیوس کو بتایا کہ امریکی انتظامیہ اس منصوبے سے پہلے ہی باخبر تھی، چاہے وقت کم ہونے کی وجہ سے روکنا ممکن نہ رہا ہو۔

ٹرمپ نے بعد ازاں کہا کہ انہیں پیشگی اطلاع نہیں دی گئی تھی اور انہوں نے کھل کر اس کارروائی پر ناراضی کا اظہار کیا کیونکہ قطر، امریکا کا ایک اہم اتحادی ہے۔

واضح رہے کہ منگل ۱۸ ستمبر کی شام اسرائیلی لڑاکا طیاروں نے قطر کی فضائی حدود کی خلاف ورزی کرتے ہوئے دارالحکومت دوحہ میں اہداف کو نشانہ بنایا۔ یہ بمباری اس مقام پر کی گئی جہاں حماس کا اعلیٰ سطحی اجلاس خلیل الحیه کی قیادت میں جاری تھا۔ اطلاعات کے مطابق شدید دھماکوں اور دوحہ کی فضاؤں میں دھوئیں کے بادلوں کے باوجود حماس کے وفد کو کوئی نقصان نہیں پہنچا۔