کابل میں دھماکہ؛طالبان کے اہم رہنما ہلاک

🗓️ 12 اگست 2022

سچ خبریں:افغانستان کے دارالحکومت کابل میں شیخ رحیم اللہ اسکول میں ہونے والے دھماکے کے نتیجہ میں طالبان کے سینئر ارکان میں سے ایک رحیم اللہ حقانی مارے گئے۔
کابل ٹائمز اخبار کی رپورٹ کے مطابق باخبر ذرائع نے بتایا کہ کابل میں واقع شیخ رحیم اللہ اسکول میں دھماکہ ہوا ، اسپوٹنک خبر رساں ایجنسی نے بھی اعلان کیا کہ کابل میں اس خودکش حملے میں طالبان کے سینئر رکن رحیم اللہ حقانی مارے گئے۔

ادھر افغانستان میں طالبان کی عبوری حکومت کے حکام نے اس دھماکے کی نوعیت کے بارے میں مزید معلومات فراہم نہیں کی ہیں جبکہ افغانستان کے مقامی میڈیا نے اس حوالے سے اعلان کیا کہ شیخ رحیم اللہ حقانی، طالبان گروپ کے ایک سینئر رکن اور کابل میں ایک دینی درسگاہ کے ڈائریکٹر، آج سہ پہر اپنے کام کی جگہ پر ہونے والے ایک دھماکے کے نتیجے میں ہلاک ہو گئے۔

واضح رہے کہ متعدد طالبان ارکان نے ٹوئٹر پر جائے وقوعہ سے تصاویر اور ویڈیوز شائع کرکے رحیم اللہ حقانی کی ہلاکت کی تصدیق کی، یاد رہے کہ رحیم اللہ حقانی طالبان کے افغانستان پر قبضہ کرنے سے پہلے پاکستان کے شہر پشاور میں ایک دینی درسگاہ چلاتے تھے، گزشتہ سال اگست میں پچھلی افغان حکومت کے خاتمے کے بعد، انہوں نے اپنا دینی مدرسہ کابل منتقل کر دیا۔