چین کے ساتھ بعض تجارتی تعلقات ختم کرنے پر غور کر رہے ہیں:ٹرمپ

 چین کے ساتھ بعض تجارتی تعلقات ختم کرنے پر غور کر رہے ہیں:ٹرمپ

امریکی صدر ڈونلڈ ٹرمپ نے کہا ہے کہ واشنگٹن چین کے ساتھ کچھ تجارتی تعلقات ختم کرنے پر غور کر رہا ہے۔ ان کے مطابق، بیجنگ نے دانستہ طور پر امریکی سویا کی خریداری روک دی ہے، جو کہ امریکہ کے خلاف ایک اقتصادی دشمنی کے مترادف ہے۔

ٹرمپ نے منگل کو  اپنے بیان میں کہا،چین جان بوجھ کر ہمارے کسانوں کو نقصان پہنچا رہا ہے۔ وہ سویا نہیں خرید رہے، جس سے ہمارے زرعی شعبے پر دباؤ بڑھا ہے۔ یہ ایک واضح طور پر معاشی حملہ ہے۔ ہم اس کے جواب میں چین سے خوردنی تیل اور دیگر اشیاء کی درآمد بند کرنے پر غور کر رہے ہیں۔ ہم ان مصنوعات کو خود بھی تیار کر سکتے ہیں۔

امریکی صدر نے مزید کہا کہ چین حال ہی میں برآمدی پابندیوں کے ذریعے عالمی منڈیوں پر دباؤ ڈالنے کی کوشش کر رہا ہے۔چینی حکام دنیا بھر کے ممالک کو خطوط بھیج رہے ہیں کہ وہ کئی مصنوعات پر، حتیٰ کہ ان اشیاء پر بھی جو چین میں تیار نہیں ہوتیں، برآمدی کنٹرول عائد کریں۔ یہ رویہ عالمی منڈیوں کو مفلوج کر رہا ہے۔

ٹرمپ نے خبردار کیا کہ اگر بیجنگ نے اپنے رویے میں تبدیلی نہ لائی تو امریکہ چینی مصنوعات پر بھاری محصولات (ٹیرف) عائد کرے گا۔ہم کئی ممکنہ اقدامات پر غور کر رہے ہیں، اور چین کو اس کے اقدامات کا جواب ضرور دیا جائے گا،” انہوں نے کہا۔

تجزیہ کاروں کے مطابق، دونوں ملکوں کے درمیان جاری تجارتی کشمکش نے دوطرفہ تجارت کو بری طرح متاثر کیا ہے۔حالیہ اعداد و شمار کے مطابق، اگست میں چین کی امریکہ کو برآمدات میں 33 فیصد کمی ہوئی، جبکہ امریکی برآمدات بھی 16 فیصد گھٹ گئیں۔

دوسری جانب، چین نے حال ہی میں نایاب معدنیات (Rare Earth Minerals) کی برآمد پر نئی پابندیاں عائد کی ہیں، جس سے عالمی سطح پر ٹیکنالوجی، دفاعی صنعت اور سبز توانائی کے شعبوں میں عدم استحکام پیدا ہونے کا خدشہ ہے۔تجزیہ کاروں کا کہنا ہے کہ یہ صورتحال امریکہ اور چین کے درمیان تجارتی جنگ کے نئے مرحلے کی نشاندہی کرتی ہے۔