چین متعدد معاملات میں ناقابلِ اعتماد شریک ہے:امریکی وزیر خزانہ 

 چین متعدد معاملات میں ناقابلِ اعتماد شریک ہے:امریکی وزیر خزانہ

 امریکی وزیرِ خزانہ اسکاٹ بَسنت نے چین پر تنقید کرتے ہوئے کہا ہے کہ دنیا کی دوسری بڑی معیشت کئی اقتصادی معاملات میں شریکِ ناقابلِ اعتماد ثابت ہوئی ہے۔ ان کے بقول، امریکہ کو چین کی جانب سے اہم قدرتی وسائل، خاص طور پر نایاب زمینی عناصر پر کنٹرول سے اپنی وابستگی ختم کرنی چاہیے۔

امریکی نیوز ویب سائٹ آکسیوسکے مطابق، یہ بیان ایسے وقت سامنے آیا ہے جب چند روز قبل ہی امریکی صدر ڈونلڈ ٹرمپ اور چینی صدر شی جِن پِنگ نے جنوبی کوریا میں ایک تجارتی فریم ورک پر اصولی اتفاق کیا تھا۔ تاہم ابھی اس معاہدے کی تحریری تفصیلات طے نہیں ہوئیں اور دونوں ممالک کے درمیان دوبارہ کشیدگی پیدا ہونے کے آثار نمایاں ہیں۔

صدر ٹرمپ نے جمعرات کو اعلان کیا تھا کہ امریکہ اور چین ایک تجارتی سمجھوتے پر متفق ہو گئے ہیں، جس کے تحت ایک سال کے لیے نایاب زمینی عناصر اور مائیکروچِپ ٹیکنالوجی کی برآمدات پر نئی پابندیاں نہیں لگائی جائیں گی، جبکہ چین نے امریکہ سے سویا بین کی خریداری بڑھانے کا وعدہ کیا ہے۔

لیکن اس کے اگلے ہی دن، چینی صدر شی جِن پِنگ نے ایک ایشیائی کانفرنس میں عالمی رہنماؤں سے کہا کہ موجودہ تجارتی تنازعے میں امریکہ کا ساتھ نہ دیں، جس سے دونوں ملکوں کے درمیان حالیہ نرمی دوبارہ تناؤ میں بدلتی نظر آئی۔

اسکاٹ بَسنت نے ایک امریکی ٹی وی انٹرویو میں کہا:ہم چین سے مکمل علیحدگی نہیں چاہتے، لیکن ہمیں خطرات کم کرنے ہوں گے۔ چین نے بارہا ثابت کیا ہے کہ وہ کئی میدانوں میں قابلِ اعتماد پارٹنر نہیں ہے۔

انہوں نے مزید کہا کہ دنیا کو سب سے بڑا چیلنج چین کا نایاب زمینی عناصر پر اجارہ داری ہے، جو سینکڑوں جدید مصنوعات  بشمول سیمی کنڈکٹرز، برقی گاڑیاں اور دفاعی ٹیکنالوجی — کے لیے بنیادی اہمیت رکھتے ہیں۔

وزیرِ خزانہ نے زور دے کر کہا:یہ معاملہ صرف امریکہ کا نہیں، بلکہ پورے عالمی نظام کا ہے۔ چین ان عناصر پر کنٹرول کے ذریعے پوری دنیا پر اثر انداز ہو رہا ہے، اور اب عالمی برادری اس کے خلاف ردِعمل دینے لگی ہے۔