ٹرمپ کا امریکہ میں مہنگائی سے انکار

امریکی صدر ڈونلڈ ٹرمپ نے ایک بار پھر مہنگائی کے سرکاری اعدادوشمار کو مسترد کرتے ہوئے دعویٰ کیا ہے کہ امریکا میں کوئی مہنگائی نہیں ہے اور تیل، توانائی اور خوراک کی قیمتوں میں کمی آئی ہے۔

یہ بیان اس وقت سامنے آیا ہے جب امریکی محکمۂ محنت نے گزشتہ ہفتے اپنی رپورٹ میں بتایا تھا کہ جولائی کے مقابلے اگست میں مہنگائی کی شرح 0.9 فیصد بڑھی جبکہ گزشتہ سال کے مقابلے یہ اضافہ 3.3 فیصد رہا۔

ٹرمپ نے کابینہ اجلاس میں کہا کہ روزگار کے اعداد و شمار انتہائی بلند ہوں گے اور ان کے دورِ صدارت میں اب تک پانچ لاکھ سے زائد نجی ملازمتیں پیدا ہوئی ہیں۔  تاہم ماہرین نے خبردار کیا ہے کہ حکومتی مداخلت روزگار کے اعداد و شمار کی ساکھ کو نقصان پہنچا سکتی ہے۔

صدر ٹرمپ نے اپنی تجارتی پالیسیوں اور ٹیرف کے اقدامات کو بڑی کامیابی قرار دیا، حالانکہ ناقدین کے مطابق انہی پالیسیوں نے امریکی مارکیٹ میں مہنگائی کو ہوا دی ہے۔ ٹرمپ نے کہا اگر میں صدر نہ ہوتا تو امریکا معاشی طور پر تباہ ہو چکا ہوتا، لیکن آج ہم پہلے سے زیادہ مضبوط ہیں۔

ٹرمپ نے کہا کہ ان پر ڈکٹیٹر ہونے کا الزام لگایا جاتا ہے لیکن وہ صرف جرائم پر قابو پا رہے ہیں۔ ان کا کہنا تھا اگر کسی کو واشنگٹن ڈی سی میں قتل کرتے پکڑا گیا تو ہم سزائے موت کا مطالبہ کریں گے۔ فی الحال واشنگٹن میں مقامی سطح پر سزائے موت موجود نہیں لیکن وفاقی قوانین کے تحت یہ ممکن ہے۔

امریکی صدر نے یوکرین کے حوالے سے کہا کہ امریکا جنگ کے اخراجات نہیں اٹھا رہا بلکہ اسلحہ بیچ کر نفع کما رہا ہے۔ ان کے مطابق، ناتو اس جنگ کو فنڈ کر رہا ہے اور امریکی فیکٹریاں پیٹریاٹ میزائلوں سمیت مختلف ہتھیاروں کی بڑے پیمانے پر پیداوار کر رہی ہیں۔

ٹرمپ نے کہا کہ اگر یوکرین میں جنگ بندی نہ ہوئی تو وہ روس پر معاشی پابندیوں پر غور کریں گے۔ ان کے بقول یہ تیسری عالمی جنگ نہیں ہوگی بلکہ ایک سخت اقتصادی جنگ ہوگی جو روس کے لیے نقصان دہ ثابت ہوگی۔

ٹرمپ نے اپنی تجویز کا بھی دفاع کیا جس میں انہوں نے امریکا میں چھ لاکھ چینی طلبا کو داخلے دینے کی بات کی تھی۔ انہوں نے کہا کہ امریکی یونیورسٹیاں چینی طلبا کے بغیر مشکلات کا شکار ہو جائیں گی۔