ٹرمپ حکومت کا شٹ ڈاؤن جاری،پارٹیوں کی جنگ سے امریکی معیشت کو 15 بلین ڈالر کا نقصان

امریکی کانگریشنل بجٹ آفس نے خبردار کیا ہے کہ وفاقی حکومت کی جاری بندش کے باعث امریکا کی معیشت کو تقریباً 15 ارب ڈالر کا نقصان ہو سکتا ہے۔ یہ بحران اُس وقت شدت اختیار کر گیا ہے جب صدر ڈونلڈ ٹرمپ اور ڈیموکریٹس کے درمیان مذاکرات کا سلسلہ مکمل طور پر تعطل کا شکار ہے۔

رپورٹ کے مطابق، حکومت کی بندش چھٹے ہفتے میں داخل ہو چکی ہے جبکہ ٹرمپ نے ڈیموکریٹس کے ساتھ کسی بھی نئی بات چیت سے انکار کر دیا ہے۔ بجٹ آفس کا کہنا ہے کہ اس تعطل کے نتیجے میں ملک کی مجموعی قومی پیداوار میں چوتھی سہ ماہی کے دوران ایک سے دو پوائنٹس تک کمی آ سکتی ہے۔

معاشی نقصان کی بنیادی وجوہات میں وفاقی ملازمین کی خدمات میں کمی، اشیاء اور خدمات پر کم اخراجات، اور غذائی امداد کے وفاقی پروگرام میں کٹوتی شامل ہیں۔

صدر ٹرمپ کا کہنا ہے کہ اگر ڈیموکریٹس اُن کی شرائط تسلیم کر لیں تو حکومت کی بندش فوراً ختم ہو جائے گی، بصورتِ دیگر یہ بحران اُن ہی کی ذمہ داری ہوگی۔ انہوں نے اپنے مخالفین کو "پاگل” قرار دیتے ہوئے کہا کہ ڈیموکریٹس نے "اپنا راستہ کھو دیا ہے”۔

ڈیموکریٹس کے نزدیک مسئلے کی جڑ صحت کے بجٹ میں کمی ہے۔ وہ مطالبہ کر رہے ہیں کہ اوباماکیئر (Affordable Care Act) کے تحت صحت کی سبسڈی میں توسیع کی جائے، جس سے 2 کروڑ سے زائد امریکی مستفید ہو رہے ہیں۔

یہ بحران اُس وقت مزید سنگین ہو رہا ہے جب لاکھوں امریکیوں کو نومبر میں غذائی کوپن (فوڈ اسٹیمپ) ختم ہونے کا خدشہ ہے۔

ایک تازہ نظرسنجی (NBC News) کے مطابق، 52 فیصد امریکی ووٹرز حکومت کی بندش کا ذمہ دار ٹرمپ یا ریپبلکن پارٹی کو ٹھہراتے ہیں۔ 25 فیصد نے ریپبلکن قانون سازوں کو، 24 فیصد نے خود ٹرمپ کو، اور 3 فیصد نے دونوں کو مشترکہ طور پر ذمہ دار قرار دیا۔

اس کے برعکس، 42 فیصد افراد نے اس بحران کا الزام ڈیموکریٹس پر عائد کیا۔ یہ سروے 24 تا 28 اکتوبر کے درمیان ایک ہزار اہل ووٹرز سے کیا گیا، جس میں 3.1 فیصد کی خطا کی گنجائش رکھی گئی۔

یاد رہے کہ یہ موجودہ تعطل 2018-2019 میں ٹرمپ کے دورِ صدارت میں ہونے والی 35 روزہ تاریخی بندش کے قریب پہنچ چکا ہے، جو امریکی تاریخ کی سب سے طویل حکومتی تعطیلی تھی۔