وینزویلا پر حملہ واشنگٹن کو عالمی تنہائی میں ڈال سکتا ہے:امریکی تحقیقاتی ادارہ

وینزویلا پر حملہ واشنگٹن کو عالمی تنہائی میں ڈال سکتا ہے:امریکی تحقیقاتی ادارہ

 امریکی تحقیقاتی ادارے سٹیمسن انسٹیٹیوٹ نے خبردار کیا ہے کہ اگر امریکہ نے وینزویلا کے دارالحکومت کاراکاس یا ملک کے دیگر حصوں میں فوجی کارروائی کی تو اس کے نتیجے میں امریکہ عالمی تنہائی کا شکار ہو سکتا ہے اور لاطینی امریکہ میں اس کی ساکھ مزید متاثر ہوگی۔

ادارے کے مطابق، حالیہ ہفتوں میں امریکہ اور وینزویلا کے تعلقات شدید تناؤ کا شکار ہیں۔ امریکہ نے کیریبین سمندر میں چند غیرملکی کشتیوں پر حملے کیے اور اب وینزویلا میں فوجی کارروائی کے امکانات پر غور کر رہا ہے۔ ٹرمپ انتظامیہ یہ کارروائیاں منشیات کے کارٹلز کے خلاف جنگ کے طور پر پیش کر رہی ہے، لیکن تجزیہ کار اسے وینزویلا پر سیاسی دباؤ اور مداخلت کا بہانہ قرار دیتے ہیں۔

دوسری جانب، وینزویلا کے صدر نیکلاس مادورو نے امریکی حملوں کو واضح تجاوز اور ملکی خودمختاری کی خلاف ورزی قرار دیا اور علاقائی اتحاد کی ضرورت پر زور دیا۔ کولمبیا، برازیل اور دیگر جنوبی امریکی ممالک کی جانب سے بھی ان حملوں کی شدید مذمت کی گئی ہے، جو واشنگٹن کی حملہ آور پالیسیوں کے خلاف عوامی بداعتمادی کو ظاہر کرتی ہے۔

سٹیمسن انسٹیٹیوٹ نے اپنی رپورٹ میں کہا کہ امریکہ کے حالیہ حملے، بشمول چار غیرملکی کشتیوں پر حملے، نہ صرف علاقائی سطح پر تنقید کا باعث بنے بلکہ داخلی اور بیرونی سطح پر واشنگٹن کو غیرقانونی اور جارحانہ سمجھنے کا سبب بھی بنے۔ ادارے نے خبردار کیا کہ اگر امریکہ نے تین ممکنہ اقدامات اپنائے:

کیریبین میں کشتیوں پر حملے جاری رکھے،وینزویلا میں ہدفی فوجی کارروائی کی،وینزویلا میں حکومت بدلنے کی فوجی مداخلت کی،تو ہر صورت میں امریکہ کی پوزیشن مزید کمزور ہوگی۔

رپورٹ میں کہا گیا کہ امریکہ کی یہ جارحانہ پالیسی علاقائی استحکام کے لیے خطرہ ہے اور اس کے نتیجے میں مادورو کی ساکھ مضبوط ہو سکتی ہے، جبکہ لاطینی امریکی ممالک کے ساتھ تعلقات خراب ہوں گے۔

ادارے نے مزید بتایا کہ امریکہ کی حالیہ کارروائیاں نہ صرف معاشی سرگرمیوں جیسے ماہی گیری، کشتیرانی اور سیاحت کو متاثر کریں گی بلکہ علاقائی عوامی غصے کو بھی بڑھائیں گی۔ رپورٹ کے مطابق، وینزویلا سے کوکائین کی بڑی برآمدات امریکہ تک پہنچنے کے لیے عام طور پر کولمبیا اور پیسفک روٹ استعمال کرتی ہیں، اس لیے کیریبین میں فوجی کارروائیاں منشیات کی ترسیل کو نمایاں طور پر کم کرنے میں کامیاب نہیں ہوں گی۔

سٹیمسن انسٹیٹیوٹ کی رپورٹ کی سفارش ہے کہ ٹرمپ انتظامیہ اور کانگریس اپنی پالیسی پر نظرثانی کریں، ورنہ امریکہ عالمی سطح پر مزید تنہا ہو سکتا ہے اور علاقائی استحکام خطرے میں پڑ سکتا ہے۔