نیتن یاہو کا انجام ہٹلر جیسا ہوگا:اردوگان

نیتن یاہو کا انجام ہٹلر جیسا ہوگا:اردوگان

ترکی کے صدر رجب طیب اردوگان نے صہیونی وزیر اعظم بنیامین نیتن یاہو کو نظریاتی طور پر نازی جرمنی کے آمر ایڈولف ہٹلر کے قریب قرار دیتے ہوئے کہا ہے کہ نیتن یاہو کو بھی آخرکار ہٹلر جیسا ہی انجام دیکھنا پڑے گا۔

ترک خبر ایجنسی انادولو کے مطابق، اردوگان نے یہ بیان قطر کے دارالحکومت دوحہ میں عرب – اسلامی ہنگامی اجلاس میں شرکت کے بعد واپسی پر طیارے میں صحافیوں سے گفتگو کرتے ہوئے دیا۔

ان کا کہنا تھا جس طرح ہٹلر اپنی شکست کا اندازہ نہ لگا سکا، اسی طرح نیتن یاہو بھی آنے والے انجام سے غافل ہے۔ اسرائیلی حکمران دراصل ایک خونی نیٹ ورک ہیں جنہوں نے اپنی انتہا پسندی کو فاشزم کی شکل دے دی ہے۔

اردوغان نے اسرائیل کے رویے کو تکبر اور جارحیت قرار دیتے ہوئے کہا کہ غزہ، شام، لبنان، یمن اور ایران پر حملوں کے بعد اسرائیل نے اب قطر میں جاری امن مذاکرات کو بھی نشانہ بنایا ہے۔

اسرائیل کسی مذہب کی خدمت نہیں کر رہا بلکہ ایک منحرف نظریے کو آگے بڑھا رہا ہے۔انہوں نے مزید کہا کہ نیتن یاہو اور اس کی کابینہ دنیا کو صرف صہیونی افسانوں کے سوا کچھ نہیں دکھا رہے، جبکہ اقوام متحدہ کا منشور صاف طور پر ریاستوں کی ارضی سالمیت، خودمختار برابری اور طاقت کے ذریعے سرحدوں کی تبدیلی پر پابندی عائد کرتا ہے۔