نیتن یاہو صہیونی پارلیمنٹ کو تحلیل کرنے کی کوشس مین 

اسرائیلی ذرائع ابلاغ کے مطابق، صہیونی وزیر اعظم بنیامین نیتن یاہو پارلیمنٹ (کنسٹ) کو تحلیل کرنے اور آئندہ تین ماہ میں قبل از وقت انتخابات کرانے پر غور کر رہے ہیں۔

بدھ کی صبح اسرائیلی ریڈیو و ٹیلی ویژن اتھارٹی کی رپورٹ کے مطابق، نیتن یاہو اس امکان کا جائزہ لے رہے ہیں کہ پارلیمنٹ کی تحلیل کے بعد عام انتخابات جلد از جلد منعقد کیے جائیں۔

اس سے قبل اسرائیلی چینل ۱۲ کے تازہ عوامی سروے میں بتایا گیا تھا کہ ۵۲ فیصد اسرائیلی شہری نیتن یاہو کی دوبارہ امیدوار بننے کی مخالفت کرتے ہیں، جب کہ ۴۱ فیصد اس کی حمایت میں ہیں۔

رپورٹ کے مطابق، اگر نیتن یاہو کے بعد دائیں بازو کے اتحاد کی قیادت کسی اور کو سونپی جائے تو یوسی کوہن کو سب سے زیادہ مقبول امیدوار تصور کیا جا رہا ہے۔

نیتن یاہو، جو غزہ میں اپنی حکومت کی پالیسیوں اور جنگی جرائم کے الزامات کی وجہ سے بین الاقوامی فوجداری عدالت (ICC) میں زیرِ تفتیش ہیں، اس سے قبل اعلان کر چکے ہیں کہ وہ نومبر ۲۰۲۶ میں ہونے والے اگلے پارلیمانی انتخابات میں دوبارہ وزارتِ عظمیٰ کے امیدوار ہوں گے۔

اسرائیلی چینل ۱۱ (کان) نے بھی کچھ عرصہ قبل رپورٹ کیا تھا کہ نیتن یاہو انتخابات کی تاریخ کو جون ۲۰۲۶ تک لانے کی کوشش کر رہے ہیں، یعنی قانونی مدت سے چار ماہ پہلے۔

سیاسی تجزیہ کاروں کے مطابق، نیتن یاہو کا یہ فیصلہ ان کی گرتی ہوئی مقبولیت اور حکومت پر بڑھتے ہوئے دباؤ کا نتیجہ ہو سکتا ہے۔