نابلس کی جیل الجنید میں درجنوں سیاسی قیدیوں کی بھوک ہڑتال

نابلس کی جیل "الجنید” میں درجنوں سیاسی قیدیوں کی بھوک ہڑتال

نابلس کی جیل الجنید جو فلسطینی اتھارٹی کی سکیورٹی سروسز کے زیرِ انتظام ہے میں درجنوں زیرِ حراست افراد کی بھوک ہڑتال کے آغاز کے ساتھ ہی "وکلائے حامیِ عدالت” گروپ نے ایک بیان جاری کرتے ہوئے گرفتار شدگان کی رہائی سے متعلق عدالتی احکامات پر فوری عملدرآمد کا مطالبہ کیا ہے۔

بدھ کے روز کی رپورٹ کے مطابق، جسے فلسطین انفارمیشن سینٹر نے نقل کیا، بیان میں قانون کی حکمرانی کے اصول کے احترام اور قانونی جواز کے بغیر افراد کو حراست میں رکھنے کی ممانعت پر زور دیا گیا ہے۔ اس میں کہا گیا ہے کہ گرفتار شدگان کی رہائی سے متعلق تمام عدالتی فیصلوں پر بلا تاخیر عمل ہونا چاہیے۔

اس حقوقی ادارے نے بھوک ہڑتال کرنے والوں کے خلاف کسی بھی ممکنہ تادیبی کارروائی کو روکنے کا مطالبہ کرتے ہوئے واضح کیا کہ بھوک ہڑتال پُرامن احتجاج کے حق کے دائرے میں آتی ہے۔

مزید برآں، وکلائے حامیِ عدالت نے فوری طور پر آزاد طبی ٹیموں کو حراستی مرکز بھیجنے، ہڑتالی قیدیوں کی صحت کا جائزہ لینے اور طبی معیارات کے مطابق ضروری علاج فراہم کرنے پر زور دیا۔

بیان میں وکلائے صفائی کے اس حق پر بھی زور دیا گیا کہ وہ بلاجواز پابندیوں کے بغیر اپنے مؤکلین سے ملاقات کر سکیں، اور اہلِ خانہ کو قانونی دائرہ کار میں زیرِ حراست افراد کی صورتحال سے آگاہ کیا جائے۔

آخر میں، اس ادارے نے انسانی حقوق کی تنظیموں کو حراستی مراکز تک رسائی دینے، وہاں کے حالات کا جائزہ لینے، ہڑتالی قیدیوں کے مطالبات کی پیروی کرنے اور رہائی کے عدالتی احکامات پر عمل نہ کرنے سے متعلق شکایات کی سنجیدہ تحقیقات کرنے کے ساتھ ساتھ کسی بھی من مانی گرفتاری پر جوابدہی کا مطالبہ کیا۔

نابلس فلسطین کے شمالی مغربی کنارے میں واقع ایک صوبہ ہے، جو فلسطینی اتھارٹی کے زیرِ انتظام ہے۔