مغربی کنارے میں اسرائیلی اقدامات کشیدگی کو بڑھا رہے ہیں:اردن

 مغربی کنارے میں اسرائیلی اقدامات کشیدگی کو بڑھا رہے ہیں:اردن

برطانیہ کے دورے پر موجود اردن کے فرمانروا عبداللہ دوم نے کہا ہے کہ مغربی کنارے میں اسرائیلی اقدامات تنازع کو مزید ہوا دے رہے ہیں اور خطے میں استحکام کی کوششوں کو نقصان پہنچا رہے ہیں۔

اردنی ویب سائٹ عمون کے مطابق شاہ عبداللہ دوم نے برطانیہ میں سابق اعلیٰ حکام اور ارکانِ پارلیمان سے ملاقات کی، جس میں خطے کی تازہ صورتحال پر تبادلۂ خیال کیا گیا۔ گفتگو کے دوران مغربی کنارے کی بگڑتی ہوئی صورتحال پر خصوصی توجہ دی گئی۔

شاہ اردن نے زور دے کر کہا کہ اسرائیل کی جانب سے غیر قانونی آبادکاری کو مضبوط بنانے اور فلسطینی علاقوں پر خودمختاری مسلط کرنے کی کوششیں حالات کو پرسکون بنانے کی مساعی کو کمزور کر رہی ہیں۔ ملاقات میں القدس، غزہ، شام اور ایران کی صورتحال بھی زیرِ بحث آئی۔

دوسری جانب اردن کی وزارتِ خارجہ نے ایک بیان میں اسرائیلی کابینہ کی جانب سے مغربی کنارے کی اراضی کو "سرکاری املاک” قرار دے کر ضبط کرنے کے منصوبے کو بین الاقوامی قانون کی صریح خلاف ورزی اور فلسطینی عوام کے حقِ خود ارادیت کو نقصان پہنچانے کے مترادف قرار دیا۔

بیان میں کہا گیا کہ اردن مغربی کنارے پر اسرائیلی خودمختاری یا قوانین کے نفاذ کی کسی بھی کوشش کو مسترد کرتا ہے۔

واضح رہے کہ اسرائیلی کابینہ نے حالیہ اجلاس میں ایک منصوبے کی منظوری دی ہے جس کے تحت مغربی کنارے کے بعض حصوں کو اپنی ملکیت میں لینے کا عمل مرحلہ وار آگے بڑھایا جائے گا۔ ناقدین کے مطابق یہ اقدام بین الاقوامی قوانین کے منافی ہے اور مغربی کنارے کے الحاق کی راہ ہموار کر سکتا ہے، تاہم اسرائیلی حکام اسے قانونی قرار دیتے ہوئے بتدریج اور قانونی جائزے کے بعد نافذ کرنے کی بات کر رہے ہیں۔