مصر کا ایران کے جوہری معاملے پر سفارتی حل پر زور

مصر کا ایران کے جوہری معاملے پر سفارتی حل پر زور

مصر کے وزیر خارجہ بدر عبدالعاطی نے ایران کے جوہری معاملے میں اختلافات کو سفارتی ذرائع سے حل کرنے کی ضرورت پر زور دیتے ہوئے خبردار کیا ہے کہ فوجی راستہ اختیار کرنے کے سنگین نتائج برآمد ہوں گے۔

مصری وزارت خارجہ کے بیان کے مطابق بدر عبدالعاطی نے ایرانی وزیر خارجہ سید عباس عراقچی سے ٹیلیفون پر گفتگو کے دوران کہا کہ مصر ایران کے جوہری معاملے میں سفارتی عمل کی حمایت کرتا ہے اور امریکہ اور ایران کے درمیان مذاکرات کا سلسلہ جاری رہنا چاہیے۔

انہوں نے اس بات پر زور دیا کہ خطے میں کشیدگی میں اضافہ روکنا ناگزیر ہے اور تمام اختلافات اور خدشات کو امریکہ اور ایران کے درمیان جاری بات چیت کے دائرے میں حل کیا جانا چاہیے تاکہ متوازن اور قابل عمل حل تک پہنچا جا سکے۔

مصری وزیر خارجہ نے کسی بھی فوجی اقدام سے گریز کی ضرورت پر زور دیتے ہوئے کہا کہ طاقت کے استعمال سے پورے خطے کو سنگین اور دور رس نتائج کا سامنا کرنا پڑ سکتا ہے۔

ایرانی وزارت خارجہ کے مطابق اس رابطے میں ایرانی وزیر خارجہ نے امریکہ کے ساتھ بالواسطہ مذاکرات کی تازہ پیش رفت، خصوصاً جنیوا میں ہونے والے حالیہ اجلاس کے بارے میں اپنے مصری ہم منصب کو آگاہ کیا۔

اطلاعات کے مطابق ایران اور امریکہ کے درمیان مذاکرات کا تیسرا دور جنیوا میں عمان کی میزبانی اور ثالثی میں منعقد ہوا، جس میں جوہری معاملے سے متعلق امور پر تبادلہ خیال کیا گیا۔