مسقط میں ایران اور امریکا مذاکرات علاقائی میڈیا کی توجہ کا مرکز

مسقط میں ایران اور امریکا مذاکرات علاقائی میڈیا کی توجہ کا مرکز

عمان کے دارالحکومت مسقط میں ایران اور امریکا کے درمیان جاری جوہری مذاکرات آج پورے خطے کے میڈیا میں سرِفہرست موضوع بنے ہوئے ہیں۔ علاقائی اور بین الاقوامی ذرائع ابلاغ اس اہم سفارتی عمل کو غیر معمولی اہمیت دے رہے ہیں۔

لبنانی خبر رساں ادارے المیادین نے مذاکرات کی براہِ راست اور لمحہ بہ لمحہ کوریج کے لیے خصوصی میڈیا ٹیم مسقط روانہ کی ہے اور اجلاس کی تمام پیش رفت کو نمایاں انداز میں نشر کیا جا رہا ہے۔

قطری چینل الجزیرہ نے بھی مسقط مذاکرات کو اپنی خبروں میں نمایاں مقام دیا ہے۔ الجزیرہ نے ایرانی وزارت خارجہ کے حوالے سے رپورٹ کیا کہ ایرانی وزیر خارجہ سید عباس عراقچی نے اپنے عمانی ہم منصب سے ملاقات میں تہران کے مؤقف، مطالبات اور ترجیحات کو واضح طور پر پیش کیا۔

سعودی عرب سے تعلق رکھنے والے چینلز العربیہ اور الحدث نے اس دور کے مذاکرات کو "انتہائی حساس” قرار دیا ہے۔ الحدث نے عراقچی کے اس بیان کو اپنی سرخی بنایا جس میں انہوں نے کہا کہ ایران امریکا کے ساتھ مذاکرات میں کھلی آنکھوں اور حسن نیت کے ساتھ داخل ہو رہا ہے۔

روسی میڈیا اداروں، جن میں اسپوتنک، روسیا الیوم اور ریانووستی شامل ہیں، نے بھی مسقط مذاکرات کو اپنی خبروں میں نمایاں جگہ دی ہے۔ اسپوتنک نے ایک بین الاقوامی امور کے ماہر کے حوالے سے لکھا کہ ایران نے مغرب کی بار بار بدعہدیوں کے باوجود سفارت کاری کا دروازہ کبھی بند نہیں کیا اور ہمیشہ مکالمے کے راستے کو ترجیح دی ہے۔

ریانووستی نے ایک ایرانی باخبر ذریعے کے حوالے سے کہا کہ مذاکرات کے نتائج کی پیش گوئی مشکل ہے، جس کی بنیادی وجہ امریکا پر عدم اعتماد ہے، جو تاحال ایک بڑا چیلنج بنا ہوا ہے۔

عراقی میڈیا نے مذاکرات کی کوریج میں صہیونی رژیم کے کردار پر توجہ مرکوز کی ہے اور تجزیہ کیا ہے کہ تل ابیب کی اصل تشویش ایران کا پرامن جوہری پروگرام نہیں بلکہ اس کی میزائل صلاحیت اور دفاعی طاقت ہے، جسے اسرائیل امریکی وفد پر دباؤ کے لیے استعمال کرنا چاہتا ہے۔

اسی طرح لبنانی ذرائع ابلاغ، جن میں المنار، العہد، یونیوز اور دیگر شامل ہیں، مذاکرات کی لمحہ بہ لمحہ رپورٹنگ کر رہے ہیں، تاہم اب تک انہوں نے اس دور کے ممکنہ نتائج پر کسی حتمی رائے یا پیش گوئی سے گریز کیا ہے۔